Tuir nia, fenomena naturál ne'e hahú ona iha Vietnam, Indonézia inklui Timor-Leste mós hahú ona.
"Laniña katak udan, anin sei boot no pezu udan-been nian sei todan, ida ne'e akontese ona iha Vietnam, Tailandia, Indonézia mós afeta ona, inklui ita TL mós udan-been komesa maka'as ona," Ismael hateten iha edifísiu Ministériu Finansas (MF) Aitarak Laran Dili, Kuarta (9/12).
Nia mós dehan, panorama ne'ebé hatudu katak fenomena naturál ne'ebé hahú akontese ona iha TL mak, anin no udan komesa hamosu inundasaun no sobu uma.
"Inundasaun boot akontese iha Suai, suku Beko ne'ebé afeta uma 88, iha parte Ermera nian anin sobu uma ho udan no anin boot, ai tohar ne'ebé rejistu temporáriu ne'e iha Ermera hamutuk 47, ne'ebé agora ekipa tékniku kontinua halo verifikasaun ho estimasaun bele to'o 100, parte Baukau mós akontese, balun ahi han, iha Dili mós mosu udan boot, sirkuitu inklui populasaun balun mós afeta inundasaun kiik," Ismael deklara.
Nia akresenta, temporáriu iha TL, seidauk iha vítima hanesan mate no kanek ba dezastre naturais iha loron hira ba kotuk ne'ebé akontese, tanba ne'e ita husu ba Maromak atu fenomena naturál ne'e labele fó todan ba TL.
Entretantu, daudaun ne'e SEPS kontinua servisu hamutuk ho Ministériu Obras Públika (MOP) hodi halo nafatin lavazen ba valeta no mota sira iha Dili, atu udan boot labele hamosu inundasaun maibé kanaliza bee sira ne'e ba liu tasi.(*)