Portavóz Komandu Jerál (Komjer) PNTL, Superintendente Xefi, Arnaldo de Araújo hateten, dezde dekretu prezidente nian fó sai, PNTL iha territóriu TL laran tomak, hala'o ona sosializasaun ba komunidade atu bele kumpri regras ne'ebé maka governu hasai ona.

"La'o tenke utiliza maskra, fase liman bebeik, mantein distansia sosiál. Ne'e tenke kumpri, liu-liu ba loja sira ne'e tenke prepara sabaun ho bee, ema tama iha ne'ebá mak sira la uza maskra, la fase liman, hasai sira husi ne'ebá. Depois sira ne'ebé servisu iha loja, tenke utiliza maskra atu moras ne'e labele da'et ba ema seluk", Arnaldo de Araújo hateten lia hirak ne’e iha Kaikoli, Tersa (05/01).

Nia dehan, bainhira iha faze sosializasaun mak identifika sidadaun ruma kontra gregra EE da-sia nian, polísia sei foti atuasaun tuir regras ne'ebé estabelese ona.

Arnaldo mós husu ba pesoal hirak ne'ebé halo distribuisaun ba ai-han sesta bázika, tenke hateten ba atu komupri mós regra tuir dekretu lei ne'ebé governu hasai.

"Komunidade ne'e lahatene, ema ne'ebé fahe sasán sesta bázika ne'e maka tenke fó hatene ba sira katak mai karik tenke uza maskra, distánsia sosial, ida ne'e. Labele fó sala ba komunidade, ita ida organiza ne'e maka tenke organiza didi'ak", nia dehan.(*)