Nia esplika situasaun atuál la korresponde la'os katak kapasidade seidauk to'o, kapasidade liu, maibé kondisaun mak sai preokupasaun.

Nia hatutan, ko'alia kona-ba profisionalizmu la'os atu prepara ema sai matenek, maibé profisionalizmu ne'e asosiasaun, kombinasaun husi kondisaun hotu-hotu, tantu materiál, morál, psikolójika atubele forma militár ida sai profisional loloos.

Lere haree katak kondisaun sira-ne'ebé governu Timor-Leste kria ezije responsábilidade boot ba profisionalizmu forsa armada nian.

"Mais ita nafatin hanesan ne'e, bele mós to'o momentu ida, lakon esperansa husi língua ofisiál ba dezenvolvimentu forsa armada ninian. Bele kebra dixiplina, ierarkia, tanba tinan ida ne'e ba oin, ita buka oinsá atu mellora kondisaun ita-nia forsa armada sira nian, liuliu ba "bem estár" forsa ninian", Jenerál Lere Anan Timur ko'alia Kuartél Jenerál Fatuhada, Dili, tersa (02/02).

Vetaranu tinan 24 ne'e sente iha dezafiu barak ona mak hasoru durante harii instituisaun F-FDTL to'o ohin loron kompleta ona ba tinan 20 transformasaun FALINTIL ba FDTL.

Biar nune'e, nia dehan, batalla boot ne'ebé FALINTIL halo seidauk hotu, batalla sei naruk tanba ne'e presiza unidade aty atinje vitória hotu.

"Unidade iha asaun, unidade iha pensamentu, unidade iha linguajen, ida-ne'e halo parte ba kadeia komandu no bloku nian ba diresaun ida, ita tenke implementa, tenke prátika, asaun, tenke hamutuk linguajen tenke ida de'it, hanoin tenke ida de'it, nu'udár bloku ba diresaun ida, nu'udár komandu ida," Lere hateten.

Lere husu jerasaun foun atu banati tuir, atu futuru mai bele dezenvolve i forsas armada ho di'akliu.

"Ita tenke ko'alia ba loos, tanba situasaun ida ne'e la'ós situasaun foun, ita harii instituisaun, ita-nia estadu, koerénsia dala-ruma laiha, tanba mentalidade kolonializmu no ba joven nian, barak mai husi frente klandestina ninian, karáter klandestina ninian, koalia husi oin buat ida, husi kotuk buat seluk," dehan nia.

Lere enkoraja membru sira atu hetan vitória ida, presiza umildade (haraik-aan), labele iha arrogánsia, labele foti-aan, dehan ida maka matenek liu.

"Ida-ne'e maka importante. Kultura ida ke timor dala ruma laiha, dala ruma ita kompete malu, sé mak matenek liu, ka sé maka beik liu. Ida- ne'e labele akontese, tanba ita iha rai ida de'it, família no objetivu ida de'it ba ukun rasik-aan", nia fó hanoin.(*)