"Aproveita oportunidade, ami hakarak hato'o ba kandidatu Ataúro no Oekussi, Munisípiu hothotu ami taka ona, parte rua ne'e mak seidauk taka, tanba ita haree ondas tasi ne'e boot", dehan Primeiru Vise Prezidente Komisaun Rekrutamentu Falintil-FDTL, Capitaun Infantaria, Rui Soares, liuhusi konferénsia imprénsa iha kuartel jenerál, Fatuhada, sábadu (29/05).

 Iha loron kinta (28/05), ekipa sira konsege ba to’o iha Portu Dili, maibé tanba ondas tasi nian boot, nune'e la konsege lori lista naran kandidatu sira atu ba taka iha área juridisaun rua refere.

 "Ohin dadeer, Oukeussi konsege ba nafatin, to'o iha Tasi klaran, kuaze to'o iha Likisá nian ne'ebá, ondas boot sira filafali mai", informa nia.

 Tanba ne'e, husu ba kandidatu sira iha RAEOA ho Ataúro atu pasiénsia nafatin hodi hein, tanba komisaun rekrutamentu sei tetu oráriu.

 "Tanba tuir oráriu, imi sei ikus, imi-nia oráriu ne'e ami sei kálkula para ikus ho ita haree ho tempu serka sanitária ne'e, para iha possibilidade iha transporte marítima la'o, ita-boot sira aproveita mai iha Dili", hatete nia.

 Entretantu, kandidatu hamutuk 2,400 ne'ebé liu ona iha faze selesaun dokumentu ne'e, kompostu husi feto 341, no mane iha 2,059 kandidatu.

 Tuir oráriu, iha loron segunda (01/06) semana oin, kandidatu sira sei hahú ona tuir teste ne'ebé hala'o husi komisaun rekrutamentu sira iha komandu Falintil-FDTL, iha sentru formasaun no terrenu Postu administrativu Metinaru, Munisípiu Dili. (*)