Ministru Defeza (MD), Filomeno Paixão hatete, lista naran ba membru FALINTIL-Forsa Defeza Timor-Leste foun seidauk públika sai tanba sei tetu atu nune'e públiku labele kestiona.

“Ne'e razaun téknika liu señor Diretór Jerál seidauk fó hatene ha'u fiar katak sira iha razaun profunda porque iha input barak mak tama e sira tetu halo didi’ak atu fó sai ne'e lista ida ne'ebé ema hotu bele simu”,  dehan Filomeno Paixão iha Palásiu Governu, kuarta (18/08).

Nune'e mós fardamentu ba membru sira ne'e mós seidauk tanba produz iha nasaun Indonézia ne’ebé aplika konfinamnetu obrigatóriu.

“Fardamentu laiha ne'e kestaun tékniku liu mais ne'e Diretór Jerál Ministru Defeza nian mais ha'u rona dehan fardamentu ne'e halo iha Indonézia, ne'ebé iha Indonézia lockdown totál iha problema ba ida ne'e”, afirma nia.

Xefe Estadu Maior Jenerál Falintil-Forsa Defeza Timor-Leste (F-FDTL), Tenente Jenerál Lere Anan Timur deklara, rezultadu teste membru foun F-FDTL sei anunsia iha fulan-agostu tinan 2021.

“Prosesu selesaun rekrutamentu ba membru F-FDTL foun hotu ona, sira ne'ebé Corona seidauk, mais ne'e na'in hira de'it, maibé ha'u bele dehan se fulan ida ne'e, la anunsia pelumenus prinsípiu fulan-agostu anunsia ona, se mak liu no se mak la liu”, dehan Lere Anan Timur. (*)