"Asina MoU (Memorandum of Understanding) ne'e servisu hamutuk apoia PNTL, bainhira PNTL hari’i unidade asisténsia médika ka klínika PNTL ne'ebé tinan 10 ona desde 2011 atividade ne'e la'o, desde klinika ne'e hari’i no hahú hala’ó serbisu, detekta katak presiza duni tanba membru PNTL barak ne'ebé afetadu ho moras sira hanesan moras hadaet, HIVSIDA, liliu ita-boot sira hatene buat ida importante ne'e PNTL barak que afeta ba moras sira ne'e”, dehan Komadante Jerál PNTL, Komisáriu Faustino da Costa, iha Timor Plaza, kuarta (27/10).
Tanba ne'e, mak servisu sira ne'e, hetan apoiu husi UNPF tantu Ministériu Saúde (MS) nomós meristopes internasionál sira.
"Atividade sira ne'e la'o kuaze tinan 10 ona, oinsá para konkretiza kaer metin liután dokumentu propriu ruma, tanba ne'e mak halo akordu ida ne'e, hodi halo prevensaun ba membru Polísia sira, ne'ebé que iha moras sira ne'e hodi fó hanoin no fó informasaun ba sira”, dehan nia.
Reprezentante UNFPA iha T-L, Ronny Lindstrom, agradese ba PNTL tanba bele iha konfiansa nafatin ba sira hodi servisu hamutuk di'ak liután iha futuru.
"PNTL nu'udar parseiru kleur ona ba UNFPA iha Timor-Leste, kuaze área hotu iha ami-nia mandatu husi jeneru to’o ba Planeamentu Familiar, HIV no
prevensaun Moras Hada'et husi Relasaun Seksual (MHRS), ohin loron ita marka nu'udar renovasaun ba parseria nomós renovasaun ba UNFPA nia komitmentu atu servisu hamutuk ho PNTL. Liuhusi assina MoU no akordo parseria ne'e sei fó dalan atu ita hametin liután ita-nia relasaun servisu ne’ebé forte no sustenavel liu no ba PNTL atubele jere rasik implementasaun programa nian”, dehan nia.
Tanba Estudu balun halo ona iha Timor-Leste kontinua hatudu katak pesoál fardadu iha númeru prevelénsia as ba MHRS no HIV kompara ho populasaun jerál, no pesoál hirak destaka iha área fronteira kontinua hatudu númeru as ba moras ka infesaun.
"Ita-nia objetivu atu hasa'e kuñesimentu konprensivu ba prevensaun HIV, hasa'e demanda ba teste HIV no assegura PNTL ho sira-nia parseiru hodi reduz hahalok risku no proteje sira-nia an no parseiru husi MHRS no HIV”, afirma nia. (*)