Komandante UPF, Superintendente Euclides Belo deklara, sidadaun hirak ne’e UPF kaptura iha tuku 1:30, liuhusi servisu vizilansia konjunta iha fronteira terrestre Timor-Leste ho Indonézia.

“Ohin dader iha tuku 1:30 ita-nia membru sekreta hosi Kuartel UPF hamutuk ho F-FDTL ne’ebé destaka iha fronteira kaptura joven mane nain 2 ho inisial ICS no JNC iha Palaka área Bemalae ho Bero ne’ebé ultrapasa fronteira ilegalmente hosi Indonézia mai teritoriu nasional”, deklarasaun Euclides Belo ne'ebé www.tempotimor.com asesu liuhusi pájina Servisu Relasaun Públika, kinta (4/11). 

Membru GAM na'in-2 ne'e nu’udar sidadaun timoroan ne'ebé agora entrega ona ba eskuadra PNTL Atabae hodi halo identifikasaun no sei entrega ba ekipa saúde COVID-19 hodi halo teste ba sira-nia saúde atu bele submete ba kuarentena durante loron 14 nia laran.

Ba kazu ne'e, sidadaun nain-rua mós presta ona deklarasaun katak sira ba sa'e sintu iha Atambua-Indonezia iha loron 9 juñu 2021 tuir dalan ilegal hosi area Bemalae Palaka ho Ró Ai hamutuk ho ema nain 12 maibe nain 10 hetan ona kapturasaun iha fulan kotuk liu-bá.

Iha fatin hanesan, Unidade Patrullamentu Fronteira (UPF) Postu Sakato, mós kaptura sidadaun timor oan na’in 1 ho naran inisial FT tinan 35, hosi Leolbatan, Suku Costa, Sub-Rejiaun Pante Makassar, tanba tama ilegal hosi Kalimantan-Indonezia mai Rejiaun Administrativa Espesial Oekussi Ambeno (RAEOA).

Sidadaun timor oan ne’e tama ba Indonezia liu husi dalan ilegal iha tinan 2003 ho objetivu hodi servisu iha DEPNAKER (Departemen Tenaga Kerja), Kelapa Sawit iha Kalimantan, hafoin desidi fila hikas mai Timor-Leste iha loron 2 fulan novembru  tinan 2021.

Pozisaun UPF halo kapturasaun ba sidadaun ne'e liuhusi servisu patrullamentu rutina iha tasi ibun área Sakato no besik fronteira Indonezia 

Dadauk sidadaun timoroan ne'e entrega ona ba parte saude hodi kumpri kuarentena durante semana rua nia laran. (*)