"Ita hatene aban iha loron 18 ne'e ema fahe kaderneta ba estudante sira ne'ebé mak remata ona sira-nia eskola, entaun ita ko'alia hamutuk ho komadante Eskuadra sira hodi asegura di'ak liután iha atividade aban nia, e ita sempre prontu nafatin hodi asegura atividade sira ne'e”, dehan Komandante PNTL Munisípiu Dili, Superintendente Xefe Henrique da Costa, iha kaikoli, segunda (17/01).
Iha loron aban ne'e envolvimentu PNTL sei maka’as tanba apoiu husi unidade Polísia, Polísia Tránzitu nasionál, servisu informasaun Polísia ninia, UPM ho UPF ne'ebé mak lokadu iha Munisípiu Dili
Nune'e mós sei koloka membru sira ba eskola hotu, inklui fatin sira ne’ebe konsideira hanesan ameasa ou risku.
Aleinde ne'e mós komamdante komandu Munisípiu Dili, husu ba estudante sira atu kontinua respeita lei kódigu estrada, lori motorizada tenke kompleta ho asesoris sira, nomós tenke lori dokumentu, tanba operasaun PNTL nian ba loron aban sei másimu liu.
Komandu Dili mós identifika ona eskola ne’ebé sempre halo problema iha tempu simu rezultadu mak hanesan eskola sira iha área Don Aleixo, Kristu Rei, Nain Feto no Vera Cruz.
“Ita identifika ona eskola sira ne’e, nune'e ita sei koloka ita nian ema, para nune’e asegura, e mós ita sei koloka ita-nian ema iha dalan sira responde kedan situasaun sira iha terenu”, dehan nia.
Iha sorin seluk mós PNTL Munisípiu Dili sei la tolera estudante sira atu halo konvoi ho motorizada iha estrada públiku, bainhira hetan mak sei aplika multa ne’ebé todan liu. (*)