Komandante UPF, Superintendente Euclides Belo hatete, situasaun seguransa iha liña fronteira kontroladu no seguru tebes, tanba movimentu sidadaun sira husi nasaun Indonézia tama mai teritóriu Timor-Leste no husi Timor-Leste ba Indonézia iha loron segunda ho kuarta nafatin kontratadu.
“Agora movimentu iha liña fronteira la’o di’ak tebes, ita-nia sidadaun sira tama no sai husi teritóriu Timor-Leste mós la’o di’ak, tanba iha ita-nia ekipa saúde kontinua kontrola sira tuir protokolu saúde mundiál nia”, dehan Euclides liuhusi telefone, segunda (14/02).
Ba estrada ne’ebé liga mota-ain iha fronteira, udan boot mota tun estraga hotu no karreta liu la di’ak, maibé ekipa patrullamentu la’o ain kontinua halo seguransa hodi garante lina fronteira ho seguru ba ema hotu.
“Tanba ami iha moto ida katak, ami-nia sakrifisiu no dedikasaun ba Estadu la sai obstakulu atu halo patrullamentu la’o ain iha liña fronteira terestre hodi garante seguransa ba ema hotu”, dehan nia.
Alende ne’e komandante UPF mós esplika, hela semana ida tan povu Timor-Leste ho Partidu Politiku sira sei halo kampaña eleitorál hodi hili kandidatura prezidente repúblika foun iha tinan 2022, tanba ne’e ekipa seguransa iha fronteira kontinua halo servisu hodi fó seguransa ba sidadaun hotu iha fronteira ho seguru. (*)
