Tempotimor (Dili)- Komandu Polísia Nasionál Timor-Leste (PNTL) munisípiu Dili, unidade operasionál simu ona orientasaun husi Komisáriu Jerál PNTL, Faustino da Costa atu koordena ho diretór edukasaun munisípál ho diretór eskola sira hotu iha kapitál Dili, atu halo seguransa ba estudante sira bainhira simu rezultadu ezame finál no bandu atu halo 'pawai' (konvoi).

Segundu Komandante PNTL munisípiu Dili, Superintendente Xefi, Euclides Belo informa, komandante operasaun simu ona informasaun no orienta ona atu bele halo koordenasaun ho diretór edukasaun munisípiu Dili, atu simu mós oráriu anúnsia rezultadu ezame nasionál iha eskola hotu-hotu, tenke koloka pesoal seguransa.

"La autoriza sira ne'ebé pawai, ida ne'e laiha, simu hotu kaderneta pasa ka la pasa fila ba uma, ajuda inan-aman para depois prepara ba tama universidade no tama sekundáriu", Euclides Belo hateten ba jornalista sira iha knaar fatin, Kaikoli, Kinta (17/12).

Euclides lori naran instituisaun seguransa PNTL Dili nian, apela mós ba estudante sira neebé passa, susesu nafatin ba sira bele kontinua eskola, no ba sira ne'ebé la passa, signifika katak sira nia susesu sei adianta ba tinan oin.

"Tanba ne'e maka labele halo problema hasoru mestre sira, determina valór atu passa la passa ne'e, sira rasik mak la tuir ezame, la'os inan-aman mak tuir ezame, la'os ema seluk mak determina, maibé sira rasik mak determina", nia apela.(*)

Tempotimor (Dili)- Instituisaun Falintil Forsa Defeza Timor-Leste (F-FDTL) liuhusi unidade Polísia Milítar (PM) sei servisu hamutuk ho Polísia Nasional Timor-Leste (PNTL) liuhusi Komando Munisípiu Dili (KMD) hodi garante seguransa iha atividade operasaun konjunta ba 'joven malandru' sira ne'ebé hatudu atitude kriminozu iha loron-boot natál ho tinan foun.