Tempotimor (Dili)-Relasiona ho deklarasaun Portavoz Rezisténsia Defende Justisa no K-RDTL ne'ebé ohin transforma aan ba Movimentu ba Dame, Ángela Freitas nian ne'ebé dehan atu halo manifestasaun hasoru Prezidente Repúblika (PR) Francisco Guterres Lú Olo iha loron 28 Agostu hodi ezije xefe estadu rejigna, maibé tanba la prinxe kritéria mak Ángela Freitas ho nia grupu adi'a manifestasuan ba 4 Setembru 2020.

Tempotimor (Dili)-Tuir Portavoz Komandu Jerál Polísia Nasionál Timor-Leste (PNTL) Superentendente xefe Arnaldo Araújo katak, iha (13/08) Unidade Patrollamentu Fronteira (UPF) kaptura sidadaun timoroan balun ne'ebé halo atividade kompa-venda ilegál iha fronteira rai inklui foti mós masin-midar hamutuk saku 69 hodi entrega ba Ministériu Públiku (MP) par prosesa tuir lei.

Tempotimor (Dili) – Komandante PNTL Munísipiu Ainaro, Justinho Menezes deklara, Konsellu Polísiamentu  Komunitáriu (KPK), ne'ebé durante ne'e apoiu servisu PNTL Munísipiu Ainaro, hamutuk ema na'in 565.

"Servisu PNTL Munísipiu Ainaro hetan apoiu maka'as husi Konsellu Polisiamentu Komunitáriu (KPK), ne'ebé ami re-estrutura kompletamente iha suku 21 Munísipiu Ainaro nian. Nune'e, totál membru KPK ne'ebé iha Munísipiu Ainaro hamutuk na'in 565. Ne'ebé sira serví iha kada suku balun na'in 25 no balun na'in 30," informa Menezes iha Hotel JL Vila, Dili, Tersa (19/11/19).

Nia afirma, membru KPK ne'ebé apoiu servisu PNTL iha suku ne'e mesak ema treinadu no hetan sertifikat louvór husi Komandu PNTL Munísipiu Ainaro nian.

"KPK sira ne'e prontu apoiu oras 24 nia laran, ba servisu PNTL nian. Tanba ne'e mak ita boot (jornalista) sira rona situasaun ladún di'ak iha fatin-fatin. Maibé, situasaun iha Ainaro hakmatek. Kualkér loron boot, sira prontu apoiu ho voluntariamente. Tanba sira iha komunikasaun no kooperasaun di'ak ho ami iha Komando PNTL Munísipiu Ainaro," nia tenik.

Komandante ne'e garantia, ho servisu hamutuk ne'e sei garante estabilidade iha Munísipiu Ainaro ba futuru.

Tempotimor (Dili) – Relasiona ho video viral ne'ebé hatudu asaun membru Polísia Militár (PM) baku membru Batallaun Ordem Públiku (BOP), Komandante Jerál Polísia Nasionál Timor-Leste (PNTL), Faustino da Costa deklara katak ida ne'e problema pesoál nian no laiha ligasaun ho instituisaun rua ne'e.

Komandante Jerál PNTL mós hasai ona orgaun ida ba membru tomak, inklui komandante sira hotu atu labele provoka situasaun liuhosi video ne'ebé viral.

"Ita hare'e husi parte akontesimentu, ema uza fali video ne'e hodi soran fali instituisaun rua ne'e. Maibé, akontesimentu ne'e bele dehan problema entre pesoál ida ba pesoál seluk. La'ós entre instituisaun rua ne'e," afirma Faustino iha Palásiu Prezidensiál Bairru-pite, Sexta (08/11/19).

Nia dehan, kuaze tinan rua, instala ona ekipa konjunta ida ne'ebé kompostu husi F-FDTL no PNTL, ho nune'e hafoin akontesimentu ne'e, ekipa ida ne'e mak atu halo investigasaun.

“Agora, investigasaun la'o ona. Husi komando rua haree karik iha infrasaun ruma, mak membru sira ne'e sei simu konsekuensia, bazeia ba regras estrutura ne'ebé iha no resultadu ne'e sei fó sai lalais liu 30 dias. Ho nune'e, husu ba membru tomak atu labele provokadu ho filmazen ne'ebé iha,” Faustino apelu.

Tempotimor (Dili) – Video Polísia Militár (PM) ‘urlele’ membru Batallaun Ordem Públiku (BOP), ne'ebé viral iha rede sosiál Facebook no Youtube tuir Xefe Estadu Maior F-FDTL, Maijor Jenerál Lere Anan Timur laiha problema. “Sira sei husu deskulpa ba komunidade,” Lere dehan.

"Husi video ne'ebé hatudu halo tauk no trauma ita nia populasaun. Mas ha'u hanoin ida ne'e laiha problema. Sira ne'ebé halo seguransa hamutuk. Sira sei halo konferénsia imprensa, hodi husu deskulpa ba ita nia komunidade sira," dehan Jenerál Lere iha Metiaut bainhira partisipa Konsolidasaun Organizasaun Sagrada Familia (OSF), Sesta (08/11/19).

Jenerál fitun rua ne'e mós husu ba instituisaun PNTL no F-FDTL atu servisu hamutuk ho di'ak.

"Ha'u apelu ba instituisaun PNTL no F-FDTL katak imi ne'e lutu ba nasaun. Liuhosi Konstituisaun mak iha funsaun la hanesan. Mais, kuandu nasaun iha perigu ne'e, instituisaun rua ne'e mak hamutuk hodi tane nasaun ne'e nia naran," dehan Lere.

Lere mós dehan, iha ne'ebé de'it sempre iha liafuan naksalak no problema. Maibé, nia hatete sempre iha solusaun. Tanba dezafiu ne'ebé mak iha ne'e, atu koko ita nia kapasidade hodi bele rezolve. La'ós atu hamonu.

Tempotimor (Dili) – Uniaun Nasionál Eskuteiru Timor-Leste (UNE-TL) halo ona planu para bele servisu hamutuk ho Polísia Nasionál Timor-Leste (PNTL), hodi nune'e bele rezolve problema juventude nian, ne'ebé durante ne'e akontese iha rai laran.

"Iha diskusaun balun ne'ebé ami halo, konaba formasaun ba karater foinsae sira nian, para juventude bele halo servisu, haklekar liután informasaun ba joven sira. Tanbá, ita preokupa loos ho problema barak ne'ebé akontese iha TL," dehan Prezidente UNE-TL, Idelta Maria Rodrigues iha Kuartél Jerál PNTL, Tersa (29/10/19).

Nia dehan, enkontru ho Komando Jerál PNTL ida ne'e, atu informa kona-ba movimentu eskutismu  iha Timor-Leste. Hato'o mós servisu no progresu saida mak bele halo hamutuk no hanoin katak iha aseitasaun ida ba futuru, atu bele asina akordu entre PNTL no UNE-TL.

"Hau hanoin konflitu ne'ebé mosu la'ós PNTL no Governu nia responsabilidade mesak. Maibé, hanesan UNE-TL ne'ebé hamahan an ba joven sira, hamutuk dirijente sira iha movimentu eskutismu ne'e, presiza koopera hamutuk hodi buka dalan no meius oioin atu nune'e bele responde ba problema ne'ebé estadu hasoru," dehan Idelta.

Iha fatin hanesan, Komandante Jerál PNTL, Komisario Faustino da Costa haktuir, PNTL nia atividades ruma bele iha suporta husi UNE-TL no husi informasaun balun ne'ebé ko'alia ona ida ne'e, presiza sensibiliza liután. Tanba, maioria iha TL barak sei intende katak UNE-TL ne'e dalaruma halai liubá eskuteriu Katóliku.

Ba oin sei hare'e mós para bele servisu hamutuk iha área balun. Tanba, PNTL mai ho nia filozofia servisu prosimidade Polísia Komunitaria. Tanba, PNTL eziste mós estrutura kona-ba Polísia  prosimidade, hahú kedas husi suku katak Konsellu Polísia Komunitariu (KPK).

"La'ós PNTL mesak, maibé husi lider komunitariu no reprezentante juventude feto no mane ate mai to'o nivel munisípiu ne'ebé hanaran Konsellu Seguransa Munisipál (KSM). Iha future, UNE-TL bele tama iha KSM ou KPK," hakotu Faustino.

Tempotimor (Dili) – Ministru Interiór (MI) interinu, Filomeno da Paixão de Jesus fó ona orientasaun ba Komando Jerál Polísia Nasionál Timor-Leste (PNTL), Faustino da Costa atu halo investigasaun kle'an ba pesoál Unidade Polísia Fronteira (UPF), iha Aeroportu Internasionál  Nicolau Lobato, Dili.  

Orientasaun husi MI interino ne'e, relasiona ho akontesementu ema sivíl motorizadu tenta atu xoke aviaun Sriwijaya Air, iha Aeroportu Internasionál Nicolau Lobato, loron hirak liubá.  

"Ema ne'ebé tama ba aeroportu ne'e lisaun boot ida ba ita. Suspeitu oras ne'e la'o hela investigasaun. Ha'u dehan ona ba komandu PNTL katak, ha'u hakarak investigasaun sériu tebetebes ba UPF ne'ebé iha ne'ebá. Tanba saida mak ema bele tama liu. Ha'u fó prazu ba sira hodi aprezenta ba ha'u hodi ita deside," afirma Filomeno Paixão iha Palásiu Governu, Kuarta (16/10/19).

Ministru ne'e rekoñese, situasaun ne'e bele akontese tanba frazilidade husi parte seguransa iha aeroportu.

"Frazilidade seguransa. Ha'u bele dehan hanesan ne'e. Nia dehan, nia lanu no problema emosionais mak tama ba. Maibé, bele mós ema aproveita tama ba no sei ne'e halo nusa!. Ne'e ita nia naran no oin monu kedas iha nasaun sira seluk nia oin," dehan Filomeno.

Meno konfesa, nia preokupa tebes ho situasaun ne'ebé tuir nia hanoin, labele akontese.

"Ha'u mós preokupa tebetebes. Tanba ne'e, mak ha'u ko'alia ho komandu PNTL para hola médidas ne'ebé haforsa ita nia seguransa sira," nia afirma.

Alende ne'e, Ministru Transporte no Komunikasaun (MTK), José Agustino da Silva mós husu parte seguransa atu halo investigasaun profunda ba akontesimentu ne'e.

"Ohin ha'u iha KM mós ko'alia kona-ba ida ne'e. Tanba ne'e, parte seguransa presiza halo investigasaun profunda liután. Tanba saida mak kazu ne'e bele akontese no motivu saida no se mak envolve iha laran," dehan MTK ne'e.

MTK husu parte hotu ne'ebé relevante, atu halo investigasaun kle'an atu nune'e bele hetan dadus ne'ebé loos, para nia parte mós bele informa filafali ba aviasaun hirak ne'ebé halo operasaun iha Timor-Leste.

Tempotimor (Dili) – Polisia Nasionál Serbisu Investigasaun Kriminal (PNSIK) sei lori suspeitu ne’ebé tenta soke aviaun Sriwijaya ba Hospital Nasionál Guido Valadares (HNGV) hodi halo atestadu mediku atu hatene suspeitu ne’e sofre moras mental ka lae.

Tempotimor (Dili) – Prezidente Parlamentu Nasionál (PPN) Arão Noé de Jesus da Costa Amarál konsidera, akontesimentu ema sivíl ho motor ne'ebé bele tama iha área kampu aviasaun Internasionál Nicolau Lobato, nuudar problema boot ba Timor-Leste.

“Akontesimentu ne'e fó duvidas boot ba estranjeiru sira atu mai vizita Timor-Leste,” PPN hatete iha Parlamentu Nasionál, Tersa (15/10/19).

Nia dehan, loloos akontesimentu ne'e, labele akontese. Tanba, nia impaktu boot ba ema atus resin ne'ebé iha hela aviaun laran.

"Asuntu la'ós atu investiga dei't suspeitu. Maibé, investiga mós ema ida fó autorizasaun bele tama iha fatin ne'ebá. No tama husi ne'ebé?" PPN ne'e afirma.

Arão husu ba Ministru Interiór para bele fó atensaun no investiga seguransa sira iha aeroportu. Tanba saida mak husik joven ne'e, tama to'o iha área ne'ebé loloos nia labele tama no perigozu.

"Akontesimentu ne'e sai problema boot ba nasaun Timor-Leste. Satán ita nia kampu aviasaun ne'e internasionál.  La'ós aviaun iha timor dei't mak semo iha ne'ebá," esplika Arão.

Ba relasaun internasionál, tuir PPN, akontesimentu ne'e grave tebes. Tanba, halo ona duvidas boot  ba estranjeiru atu tama mai Timor-Leste, bainhira iha situasaun sira hanesan ne'e.

PPN ne'e subliña, tenke foti sansaun ba joven ne'ebe tama ba kampu aviazaun no investiga seguransa iha fatin ne'ebá. Nia dehan, seguransa sira tenke responsabiliza para iha future, labele akontese tan.

"Ba jestaun sira iha aeroportu, responsabiliza ba akontesimentu ne'e. Frakeza iha liña seguransa nian entaun presiza haforsa. Se lae duvidas ba estranjeiru sira atu mai vizita nasaun Timor-Leste," tenik PPN.

Tempotimor (Dili) – Ministru Interiór (MI) interino, Filomeno de Jesus Paixão afirma, funsionáriu Polísia Imigrasaun nain 30, tenke fila ba funsionáriu reguler hanesan membru Polísia baibain. Tanba, servisu Polísia Imigrasaun, tuir dalan legál, presiza halo rotasaun.

"Servisu, kuandu tinan rua ou tolu ona presiza halo rotasaun. Tanba, iha fronteira ne'e la'ós hanesan ita nia uma lisan, para hela iha ne'ebá kleur. Se lae, orsida lisan aat mosu fali iha ne'ebá. Tanba ne'e, presiza troka husi ulun to'o ain," afirma Filomeno iha Palásiu Governu, Kuarta (02/10/19).

Nia dehan, funsionáriu Polísia Imigrasaun nain 30 iha fronteira ne'e, fila mai la'ós tanba de'it irregularidade. Maibé tanba presiza hala'o rotasaun servisu.

"Iha parte seluk, Lei mós la fó admite para funsionáriu Polísia hela iha imigrasaun fronteira permanente. Tanba ne'e, presiza troka," Paixão esplika.