Bazeia ba desizaun governu ne'ebé hili ona vasina husi universidade Oxford iha nasaun Inglaterra ho naran AstraZeneca hodi halo vasinasaun ba populasaun Timor-Leste, atubele prevene pandemia Covid-19 nia evolusaun iha rai laran.

Doutór Noel Gama Soares husi Ministériu Saúde (MS) hatete, formasaun ne'ebé fó ba pesoál saúde sira iha munisípiu Bobonaru kona-ba vasinasaun ne'e mai husi MS rasik inklui parseiru sira hanesan Organizasaun Mundiál ba Saúde (OMS) no Institutu Nasionál ba Saúde (INS).

“Ita hatene katak iha sentru saúde ne'e Ita sei halo mikroplan ne'ebé depende forsa ka profisionál saúde sira iha Sentru Saúde, nune'e halo mikroplan no depende ba tarjeitu populasaun ne’ebé iha munisípiu Bobonaru”, dehan Doutór ne’e ba www.tempotimor.com, segunda (22/03).

Iha fatin hanesan, Diretór Saúde Munisípiu Bobonaru João Baptista Mau Cardoso hatete, tuir planu governu nian katak, iha semena primeiru fulan-abril nian sei halo vasinasaun ba sidadaun sira ne'ebé hela iha fonteira inklui pesoál importante sira.

"Planu nasionál nian ita tenta atu realiza lansamentu iha loron hitu fulan-abril tinan ida ne'e tanba ne'e mak dadaun ne'e ekipa nasionál halo hela treinamentu ba Saúde sira ne’ebé mak atu implementa vasinasau ne’e”, dehan nia.

Treinamentu ba pesoál saúde sira iha Bobonaru durante loron tolu ne'e, formadór sira mai husi Organizasaun Mundiál ba Saúde (OMS), INS no MS ho objetivu atu halo prevensaun ne'ebé di'ak liuba povu liuhusi vasinasaun, nune'e hasa'e komunudade sira-nia imunidade hodi luta kontra Covid-19 ne'e.

“Ohin to'o kuarta iha Munisípiu Bobonaru realiza hela treinamentu ba pesoál saúde, tanba munisípiu Bobonaro iha sentru saúde hitu, ne'ebé kada sentru saúde delega hela pesoál na'in-5”, dehan Diretór Saúde Bobonaru ne'e.(*)