Tempotimor (Dili) – Koordenador ONG La’o Hamutuk, Celestino Gusmão hatete, loron 30 Agusto 2019 sai nu'udar loron importante ba Timor-Leste. Tanba, Timor-Leste hetan ninia soberania ba Tasi Timor.
Maske nune'e, Cesaltino fanu ema hotu-hotu nia hanoin kona-ba Timor-Leste nia belun di'ak na’in rua, Witness K ho Bernard Collaery ne'ebé agora iha hela prosesu judisáriu iha sira nia nasaun Austrália.
"Agora iha média Austrália no iha rai laran namanas loos kona-ba ita nia kolega na'in rua. Ba povu TL no ba ami Movimentu Kontra Okupasaun Tasi Timor (MKOTT) Witness K no Bernard Collaery sai erroi ba Timor-Leste," dehan Celestino Gusmão iha Palásiu Prezidensiál, Kinta (08/08/2019).
Nia dehan, lider nasionál Timor-Leste preokupa ho belun na’in rua ne'e. Tanba belun boot na'in rua ne'e, iha hela prosesu judisiáriu iha Austrália.
"Oras ne'e sira na'in rua iha hela prosesu judisiáriu. Ita nia lider nasional hanesan señor Ramos Horta mós preokupa, maun boot Xanana Gusmão mós preokupa ba kestaun ne'e. Katak ema na'in rua ne'e, TL nia belun boot. Ita hakarak selebra vitória boot ne'ebé ita hetan selebra tinan 20 konsulta popular iha kolega na'in rua nia terus leten," dehan Celestino
Collaery ho Witness K sai belun di'ak Timor-Leste nian, depois sira na’in rua deskreve asaun espionase ne'ebé hamosu preokupasaun kona-ba serbisu sekretu ida husi ASIO, Austrália nia ajensia ba servisu sekretu nia operasaun, ne'ebé monta instrumentu espionase iha edifisiu ida iha Díli, iha tinan 2004. Hahalok ne'e akontese durante prosesu negosiasaun kona-ba tratadu mina no gas Tasi Timor la'o namanas hela entre Timor-Leste ho Australia.