Tuir Natalino do Rego nu'udar portavoz ba motorista no ajudante sira liuhusi pers konferénsia katak, serka sanitária ne'ebé aplika iha Covalima, ikus mai la hetan rendimentu, tanba bus labele movimentu husi Suai ba Dili inklui na'in ba transporte la selu.
"Ami konjak ho supir husi munisipiu Covalima, durante ne'e la hetan vensimentu tanba estadu aplika serka sanitária bazeia ba dekretu Prezidente Repúblika nu. 1/2021, depois patraun mós la selu ona ami, entaun ami kondutór no ajudante sira hasoru hela problema boot no tenke sakrifika ami-nia familia," dehan Natalino liuhusi konferénsia imprensa iha debus, Segunda (8/3).
Natalino akresenta, situasaun ne'e hamosu problema iha uma laran, liu-liu oinsa atu sustenta familia uma laran.
"Ami nia fen ho oan halerik ba hahan,tanba kareta la halo movimentu, entaun patraun sira labele selu ami," Tenik nia.
Iha fatin hanesan Octavio do Carmo afirma, estadu emerjénsia dahuluk to'o ágora motorista no ajudante sira seidauk hetan kompensasaun ruma husi guvernu. Maske polítika katak atu fó subsidi ba motorista sira, maibé to'o agora laiha mezmu dokumentu sira entrega hotu ona iha Ministériu Solidariedade Sosiál e Inkluzaun (MSSI).
"Ami agora triste tebes, tanba bus la halai ami la hetan osan, ami husu patraun mós osan la iha, kareta la halai, mezmu iha estadu emerjénsia ida uluk haruka ami hatama hotu kartaun elektorál iha MSSI, maibé to'o agora mos la responde," nia katak.
Entertantu ho situasaun serka sanitária motorista no ajudante atus ida resin iha Covalima ejize ba governu atu haree situasaun ne'ebé motorista no ajudante sira hasoru, nune'e fen no oan sira labele halerik ba hahan.(*)
