Bainhira governu aplika serka sanitária iha Covalima, estudante sira hasoru dezafiu barak kona-ba hahán, tanba la autoriza família sira atu lori hahán ba sira ne’ebé hela iha dormitóriu (assrama).

"Durante serka sanitária to'o ágora tenke tane bikan ba família iha Suai hanesan tiu ka dalaruma na'ok ema nia nú hodi kalsu kabun. Entaun ha'u hetan hahán ne'e araska tebes, inan-aman iha foho Fatumea, atu tun mai ka lori osan ba ami mós labele tanba polísia taka dalan, entaun ami tuir maun balun sira ne'ebé mak servisu, ami tabele ba sira hodi hetan hahán ka kalsu netik kabun ba loroloron ka dalaruma ami sa'e ema nia nú to’o na'ok ema nian hodi aguenta ba moris loroloron nian to'o agora”, dehan Elizário ho mataben nakonu bainhira jornalista www.tempotimor.com dada-lia ho nia iha resintu ESJP Suai, segunda (15/03).

Elizário ne'ebé tuur ona iha klase tereiru anu kontinua konta katak, “atu husu ajuda ba ema seluk mós ha'u sente ladi'ak se ba tiu no maun sira ladi'ak, tenke obriga ba na'ok ema nia nú dalaruma apa telefone husu ha'u-nia kondisaun, maibé apa tanis de'it hodi dehan, oan atu halo nusa loos, situasaun mak la permite ba ami atu haree oan sira”, konta nia ho mataben monu.

Foinsa'e ne'ebé iha esperansa boot ba nia futuru ne'e nakloke liután katak, to'o agora sira-nia fós hodi augenta moris seidauk iha.

"To'o agora ami-nia fós laiha nafatin, ne'ebé dadersan ho meudia ami tenke tuir maun sira halo servisu ka dalaruma ami la'o ba, la'o mai la hetan família balun, tenke hanesan ohin ha'u dehan ba na'ok ema nia nú," nia espresa.

Diretór Eskola Sekundária Jerál Públika (ESJP) Suai, Francelino Freitas mós rekoñese, durante serka sanitária, estudante balun tane liman duni ba família no ema seluk.

"Durante ne'e ha'u haree resik ho matan, balu see bikan ba nia família sira hanesan nia tiun sira. Entaun lista sira ne'e ami sei aprezenta ba Edukasaun Munisípiu Covalima para haree ba preokupasaun hirak ne'e nomós ami tenta hela atu hatama lista ne'e ba grupu EKSES-20, nune'é bele ajuda sira hanesan fós saka ida ka rua hodi augenta sira-nia moris”, dehan nia.

Maibé, parte eskola halibur ona dadus estudante sira ne'ebé mai husi postu administrativu Fatumea, nune'e parte eskola bele hatene estudante husi fatumea hira mak hala'o estudu iba ESGP, tanba estudante balu sei iha foho no balu mak iha Suai ne'ebé enfrenta hamlaha.

"Agora ami halibur ona estudante hamutuk 35, maibé sira husi nono ano seidauk rejistu tanba sira eskola parte lokraik”, akresenta nia.

Tuir observasaun jornalista www.tempotimor.com iha terrenu nota katak, estudante husi postu Fatumea balu komesa rejistu ona naran iha gabinete diretór nian, maibé sira ne'ebé sei iha foho, eskola kontinua hein no fó tempu ba sira atu rejistu.(*)