Reprezentante komunidade aldeia Holba, Jerónimo da Cruz (41) hatete Timor-Leste ukun-aan tinan 19 ona, maibé komunidade iha aldeia ne'e seidauk sente saida mak ukun-an, tanba to'o agora seidauk asesu eletrisidade no estrada ho di'ak.

"Ami aldeia tolu hanesan Holba, Fatuloro no Macous-to'y oras ne'e seidauk asesu eletrisidade no estrada. Mezmu iha tinan 2016 ami simu solar Panel, maibé ate agora ami uza de'it lampu tradisionál, entaun ami husu parte relevante sira, tanba saida mak to'o agora mós ami nafatin halerik eletrisidade no estrada inklui ami-nia produtu lokál sira atu lori ba merkadu Suai ladi'ak tanba kondisaun estrda aat, entaun ami-nia produtu sira aat hotu de'it”, dehan Jerónimo ba jornalista www.tempotimor.com iha nia rezidénsia Holba, kuarta (24/03).

Reprezentante veteranu husi aldeia Makous, suku Taroman, Alberto Alves (67) dehan, preokupasaun ne'ebé durante ne'e povu Makous enfrenta problema liña eletrisidade no estrada, entaun triste tebes kuandu goveenu la hatan preokupasau aldeia tolu ne'e nian.

"Ami la husu buat seluk, ami husu de'it mak listrik oan ne'e, bele mai to'o ami, tanba ita ukun-an tinan barak ona, maibé ami nafatin halerik ba ahi ne'e, entaun ami aldeia tolu ne'e la'ós timoroan ka halo nusa,”, dehan nia.

Xefe suku Taroman Leonel Asa (59), rekoñese, aldeia tolu iha suku Taroman mak seidauk asesu ba liña eletrisidade. Maibé hanesan autoriedade lokál hato'o ona preokupasaun ne'e ba nivél munisipál, maibé to'o agora laiha resposta pozitivu ida.

"Ha'u hato'o bei-beik ona kona-ba estrda no eletrisidade nian, maibé to'o agora laiha responde ruma kona-ba aldeia tolu nia preokupasaun ne'e. Problema ne'e hato'o ona ba EDTL Munisípiu Covalima nomós Obras Públika munisípiu nian, maibé husi obras públika mak orienta ona Institutu Jestaun ba Ekipamentu (IJE) hodi hadi'a estrda iha ne'e, maibé tanba Covid-19, entain servisu paradu hela”, afirma nia.

Entertantu totál populasaun aldeia tolu ne'ebé la asesu liña eletrisidade iha suku Taroman, Postu Administrativu FatuLulik, Munisípiu Covalima hamutuk 1.474. (*)