“Asisténsia ne'ebé halo la'ós de'it ohin maibé ba tinan sira tuir mai ita sei fó nafatin asisténsia ba programa ne'e hodi book-an, hodi dezenvolve-an sai ba ema hotu nia leet”, dehan Ministru Francisco bainhira halo lansamentu programa naroman ba suku iha suku Dato-Tolu, Postu Administrativu Fohorem, kinta (06/08).
Programa Naroman ba suku iha área MAPKomS nia ne'e oinsá fó formasaun ba joven sira iha suku, nune'e halo naroman Komúnidade nia hanoin iha suku kona-ba dezenvolvimentu ne'ebé la'ó iha rai laran.
Tanba Governu nia hakarak, lori dezenvolvimentu konsentra iha povu, tanba povu mak sai na’in ba dezenvolvimentu.
“Mai tau iha ne'e mós la'ós ami mak mai halo, ami fó asisténsia ba ita-boot sira, mais imi joven sira ne'ebé iha ne'e mak hala'o atividade, joven sira mak sei hala'o tanba sira mak sai sentru ba dezenvolvimentu”, dehan nia.
Nune'e orsamentu tinan 2022 la'ós ona tau de'it maibé sei bazeia ba programa sira hotu ne'ebé iha suku laran.
Tanba ne'e atu garante de'it ba joven sira ne'ebé mak ho programa estabelesimentu sentru formasaun iha ne'e, kuidadu sentru Formasaun ne'eba.
“Tanba ita-boot sira la'ós mesak governu liuhusi MAPKomS sei hamriik iha ita-boot sira-nia sorin fó asisténsia nafatin ba atividade sira ne'ebé iha ita-boot sira-nia sentru ne'e”, afirma nia.
Entretantu MAPKomS mós hein katak sentru formasaun ne'e bele habelar liután oinsá mak atu halo kombate ba propagasaun Covid-19 iha Timor-Leste.
Joventude suku Dato-Tolu, Tomas de Carvalho, mós kompremetidu sei tuir formasaun ne'e ho di'ak hodi bele ajuda governu hodi fó informasaun ba nia komunidade sira iha suku refere.
Maibé husu ba parte kompaña telekomunikasaun sira hodi bele ajuda sira iha rede internet nia tanba iha suku refere laiha rede internet.
“Kontente tebes ba programa naroman ba suku ne'e, maibé husu ba kompañia Telemor, Telkomsel, no Timor Telecom, atu ajuda ami liuhusi liña internet ho nune'e ami bele tuir formasaun sira ho di'ak, tanba iha ne'e rede internet laiha entaun susar tebes ami atu asesu informasaun”, hatete nia. (*)