Tuir informasaun ne’ebé www.tempotimor.com, asesu iha pájina FXTL, kuarta (03/08) katak, ekipa Xadrez Feto Timor-Leste bainhira kompete iha jogu ronda dalima ne'ebé hahú iha tuku 3 (oras chennai-índia).
Iha jogu ne’e, atleta Nasionál, Zulmira A. Tilman ho estratéjia no tátika tomak konsege nakfilak situasaun iha kuadru xadrez husi lakon ba empata hasoru adversáriu ho Diakite Adama.
Nune’e atleta Nasionál seluk ne'ebé ho idade ki'ik-liu iha kontijente Timor-Leste nian, Sonizia T. da Silva lori tempu kuaze oras tolu atu hakoi mehi liurai husi oponente ho naran Kone Karine.
Dominasaun husi atleta Feto Timoroan la to'o de'it iha ne'e. Tanba atleta potensial Maria do Ceu ne'ebé mak mós nu'udar Kampiaun iha Kampionatu Nasionál Xadrez Timor-Leste ba kategória feto iha 2021, ho serteza halakoin liurai husi oponente Diakite Tenin hafoin joga kuaze oras haat nia laran.
Atleta Feto Timoroan seluk, Elfiana dos Santos ne'ebé mós nu'udar Kampiaun iha Kampionatu Nasionál Xadrez iha tinan hirak liu-ba manán adversáriu Kone Clarice hafoin joga kuaze oras hat hobalun nia laran.
Ho manán iha Ronda Dalimak ne'e, Ekipa Feto Timor-Leste rekolla pontu 3.5 husi manán tolu no empata ida. Husi rezultadu iha Ronda Dalimak nian ne'e, Ekipa Feto Timor-Leste mós gaña ona pontu akumulativu 6.5.
Husi parte Ekipa Mane nian, atleta Timoroan sira la konsege gaña pontu hafoin atleta Helder de Araújo ne'ebé ramata jogu ikus liu iha Ronda Dalimak la-konsege vense ninia adversáriu husi Nasaun Somalia.
Tanba ne'e, atleta mane na’in-tolu seluk tenke rekuñese oponente sira nia sorte. Hafoin Ronda Dalimak, Ekipa Mane Timor-Leste sei nafatin ho totál pontu akumulativu 6.
Ba Olimpiade Xadrez Mundiál ne'e nasaun liu 188 mak kompete ho Ekipa Feto no Mane. Iha tinan 2018, Timor-Leste partisipa de'it ho Ekipa Mane, iha ne'ebé Atleta Nasionál Tito dos Reis hetan ninia títulu nu'udar Candidate Master direta husi FIDE (Federasaun Xadrez Internasionál) tanba iha momentu ne'ebá manán totál jogu 6. Nune’e iha Tinan ne'e, Timor-Leste partisipa ho Ekipa Mane no Feto.
Maske Federasaun Xadrez Timor-Leste (FXTL) nu'udar federasaun ho idade nurak tanba foin establese iha tinan 2014, kompara ho Federasaun Xadrez sira husi nasaun seluk ne'ebé ninia xadrez dezenvolvidu ona durante kuaze tinan 50 to'o tinan 100 liu.
Federasaun ho idade nurak ho atleta foun ne’ebé ladún iha esperiénsia internasionál, kondisaun kuaze laiha, maibé konsege halo oponente sira ne'ebé tuir bebeik ona Olimpiade Xadrez Mundiál konsege hakneak.
Ba jogu ronda daneen nian ne'ebé sei realiza iha loron 3 Agostu 2022 oras tuku 3:00. (*)