Tuir informasaun ne’ebé www.tempotimor.com, asesu iha pájina FXTL, sesta (05/08) katak, rezultadu impresivu hatudu husi Atleta Feto no Mane Timoroan sira hafoin jogu Ronda Daneen iha Olimpiade Xadrez Mundiál ne'ebé realiza hela iha Sidade Chennai-India.
Ekipa Feto kompostu husi Atleta Elfiana dos Santos, Maria do Ceu, Sonizia Tilman da Silva no Zulmira Americo Tilman joga di'ak tebes tanba Manán Nasaun Mali no Nasaun Kameroon alende atleta balun manán no empata ho nasaun seluk, lori Ekipa Timor-Leste klasifikadu iha pozisaun 108 husi totál nasaun 162 ne'ebé hola parte iha Olimpiade ne'e.
Ho klasifikadaun ne’eb’e iha siknifika mós Ekipa Feto Timor-Leste ultrapasa Nasaun 54 ne'ebé Jogu Xadrez la'ós Modalidade Desportiva foun iha sira-nia nasaun kompara ho Timor-Leste ne'ebé ninia federasaun foin halo tinan 8 ba 9.
Situasaun kuaze hanesan mós akontese iha Ekipa Mane Timor-Leste ne'ebé kompostu husi Tito dos Reis, Helder de Araújo, Cosme Guterres no Marcos da Conceição.
Hafoin jogu ronda daneen, Ekipa mane klasifikadu iha pozisaun 173 husi totál nasaun 188 ne'ebé kompete iha Eventu Mundiál ne'ebé babain realiza kada tinan 4.
Ho klasifikasaun ne'e mós hatudu katak Ekipa Mane Timor-Leste ultrapasa ona nasaun 15 seluk mak hola parte mós iha eventu élitu refere.
Hafoin ronda daneen ne'ebé realiza iha loron 3 fulan-augustu, atleta hothotu hetan biban atu deskansa iha loron 4 augustu nune'e ronda dahituk realiza iha loron 5 augustu 2022, tuku 3:00 oras Chennai-Índia.
Iha ronda dahituk Ekipa mane hasoru Ekipa husi nasaun Fiji no Ekipa Feto sei hasoru Ekipa husi nasaun Zimbabwe. (*)