Marxa ba paz komemorasaun loron mundial feto ne’e ho tema igualidade, kualidade no inovativu ba ema hotu.
"Ita haree ba situasaun jeral iha Timor-Leste dalabarak ita-nia siadde la sai fatin ne’ebé seguru ba ema ferik-katuas, joven, labarik no ema sobrevivente sira, tanba ne’e mak ita hakarak halo marxa dame ida ne’e, atu hatudu ba Timor-Leste nu’udar nasaun ne’ebé tenke respeita ba direitu umanu”, tenik Diretora Ezekutiva Fokupers, Maria José Guterres, iha jardim Rosa Muki Bonaparte, Sesta (15/03).
Nia dehan, presiza respeita igualidade jéneru, justisa, dame no soliedariedade, tanba feto sobrevivente barak, estudante feto joven no labarik la sente seguru bainhira konflitu ida akontese iha rai ne'e.
“Ita hotu iha devér no obrigasaun atu asegura dame no estabilidade iha ita-nia nasaun, tanba asegura paz, dame no estabilidade ne’e la’os F-FDTL no PNTL nia servisu de’it, maibé ita hotu nia obrigasaun”, tenik nia.
Entretantu Prezidente Konsellu Nasionál Joventude Timor-Leste, Maria Dadi Magno dehan, uluk feto luta husi rezisténsia to’o agora feto sei luta nafatin.
Nia hatutan, luta ne’e la para tanba Konstituisaun prevé ona katak feto ho mane nia partisipasaun hanesan iha vida polítika, ekonómia, sosiál no kultura.