Ho alterasaun ida ne'e, hatur mudansa adisionais balun bá rezolusaun ne'ebé aprova tiha ona iha loron segunda 08 Fulan Marsu tinan 2021 maka, hapara movimentu transporte públiku iha Dili laran, no la autóriza ema tama, no sai iha Munisípiu Dili.

Ministru Prezidensiá Konsellu Ministru, Fidélis Leite Magalhães esklarese, rezolusaun ne'e, Konsellu Ministru mós desidi hapara transporte públiku sira ne'ebé mak tula pasageiru barak, tanba fó risku bá saúde públiku.

"Konsellu Ministru mós desidi atu hapara transporte públiku sira ne'ebé maka lori ema barak, tanba fó risku bá saúde públiku", dehan Fidélis liu-husi konferensia Impresnsa hafoin reuniaun Konsellu Ministru iha edifísiu Ministériu Finansas aitarak-laran, kuarta (10/03/21).

Iha rezolusaun ne'e mós, sei taka totál movimentasaun bá-mai entre Munisípiu Dili no Munisípiu seluk, só bele autóriza mak sira ne'ebé hala'o atividade urjenti, no hetan autórizasaun husi Ministériu Interiór ho Sentru Integradu Jestaun Krizi (SIJK).

"Agora klaru liu tán, hatur katak, ema sésé de'it husi Munisípiu sira atu tama mai Dili, tenki iha autóriza husi Ministériu Interiór, no informa bá iha Sentru Integradu Jestaun Krizi, ho presopostu ida katak, sai mós labele, tama mós labele", Nia hatete

Atividade ho karkter urjenti, hanesan lori ai-han, no ekipamentus médiku sira.

"Hanesan lori ai-han sira sai husi ou tama mai Munisípiu Dili, fornese serbísu sira bá seguransa, lori ema moras, hirak ne'e maka sei hetan autórizasaun", tenik nia

Nune'e mós hatur iha rezolusaun ne'e, sei fo sansaun ba hirak ne'ebé la obedese bá medidas serka sánitaria iha Munisípiu Dili.

"Iha rezolusaun ne'e mós hatur ho kle'an liu tán, referensia ida bá kodigu penal ba kriminálizasaun hirak ne'ebé maka, lakohi obedese bá medidas serka sánitaria, no konfinamentu obrigatoriu", Nia akresenta. (*)