Prezidente Autoridade Nasional Aviasaun Timor-Leste (ANATL), José Trindade hatete, tuir loloos, iha pasajeiru hamutuk na'in-241 mak mai Timor-Leste (TL) ho Aviaun EuroAtlantic, maibé sira ne'ebé tun ohin dadeersan, iha de'it na'in-197 hamutuk ho ekipa téknika (crew) iha totál 204.

"Tuir loloos, pasajeiru 241 mak mai, maibé ohin sira ne'ebé tun, iha pasajeiru 197, hamutuk crew iha 204. Maiória profesór Portuges inklui timoroan balu", informa José ba jornalista sira iha nia kna'ar fatin Aeroportu Komoro Dili, segunda (15/03).

Pasajeiru na'in-197 ne'e, kompostu husi profesór Portugéz na'in-100-resin, no timoroan iha na'in-50 resin, inklui ekipa téknika sira, totál hotu iha 204.

Informasaun seluk ne'ebé jornalista www.tempotimor.com rekolla husi pesoál seguransa ida ne'ebé hala'o hela misaun iha Aeroportu haktuir katak, pasajeiru sira ne'e, ekipa Sentru Integradu Jestaun Krize (SIJK), transporta ona ba kuarantena 6 iha Dili mak hanesan, Òtel Timor, Golgota, Arbitu Beach, Fortuna, Luxury ho Otél Audian, inklui ekipa téknika aviaun nian sira mós destaka hotu iha Otél Timor.

"Profesór Portugez hamutuk atus-ida-resin, sira ne'e sei koloka ba Otél tolu mak hanesan, Otél Timor, Golgota ho Arbiru beach, no timoroan hamutuk na’in-50- resin ne'e, koloka ba Otél Audian, Luxury no Fortuna”, dehan nia.

Tuir planu aban (loron tersa-16/03/2021) mak Aviaun EuroAtlantic sei semo filafali husi Aeroportu Internasional Nicolau dos Reis Lobato, Komoro Dili-TL, ba Portugal ho oras no númeru pasajeiru ne’ebé seidauk serteza.(*)