“Ba universidade ida ne'e, ita hotu espera katak, la'ós atu aumenta tan númeru Institutu Superior sira ne'ebé atinje ona 18 universidade, maibé ha'u hanoin katak universidade ida ne'e sei marka diferente husi universidade sira seluk ne'ebé eziste ona iha Timor", dehan Reprezentante Ministru Ensinu Superior Siénsia no Kultura (MESSK), José Cornelio Guterres, ba jornalista sira, hafoin serimónia inaugurasaun, ba Universida Katolika Timorense (UCT), iha Balide, kinta (24/03).

UCT la'ós atu hanorin buat foun de'it iha universidade refere maibé, maibé mós oferese kondisaun di'ak iha prosesu aprendisajen ne'ebé bele hatudu liuhusi materia didatika no profesór sira ho kualidade.

Alende ne'e Governu presiza halo limitasaun ba Ensinu Superior sira ne'ebé mak durante ne'e ka iha kualidade no dosente sira ne'ebé la atensaun ba estudante sira.

“Governu mós iha hanoin kona-ba nasaun nia ambisaun atu produz Ensinu Superior ne'ebé eselente no bele fó-an tomak hodi aposta liuba kualidade ho universidade sira seluk”, afirma nia.

Nune'e husu ba estudante sira atu aprende iha siénsia teoria iha aula, sala peskiza, no servisu komunitáriu.

Maibé enkoraza dosente sira iha UCT katak, atu konkista universidade ho kualidade papel dosente sira tenke hatoman halo peskiza.

“Tanba liuhusi peskiza, ita bele hamosu siénsia foun iha universidade ida”, deklara nia.

Reitór UCT, Joel Casmiro Pinto hatete, UCT nia ezisténsia la'ós atu kompete Universidade Nasionál Timor Lorosa'e (UNTL) maibé atu hasa'e nia kualidade, hahú ho fakuldade haat no iha Departamentu Sanulu.

“Ha'u hanoin la'ós atu kompete maibé atu hasa'e kualidade Ensinu Superior ida iha rai ida ne'e, UNTL ne'e la’o kleur ona, nia nune'e nia ami-nia senior ona”, dehan nia. (*)