“Ohin reprezentante Amu Papa ninia rasik ko'alia ba ita hotu iha ne'e dehan, Amu Papa ko'alia ba nia pesoalmente hakarak duni atu mai Timor, maibé data seidauk fiksu”, dehan Arkebinpu Dom Virgilio ba jornalista sira, hafoin serimónia inagurasaun, ba Universida Katolika Timorense (UCT) São Paulo II, iha Balide, kinta (24/03).

Tanba data ida atu determina ne'e seidauk sai entaun hein hela ida ne'e, hafoin bele hatene mai iha sa fulan no sa loron.

“Tanba Amu Papa rasik seidauk deside sa loron mak atu mai, razaun saida mak seidauk deside ita la hatene, maibé data seidauk determina”, haktenik nia.

Ho ida ne’e, mak reprezentante Amu Papa dehan, nia parte mós sei hein de'it bainhira mak Amu Papa deside loron atu mai vizita sarani sira iha Timor-Leste ne'e.

Antes ne'e fó sai ona katak, tinan 2022, amu Papa Francisco sei vizita Timor-Leste maibé seidauk iha data ne'ebé fiksu

“Sim tinan ida ne'e duni mak Amu Papa atu mai, maibé iha sa fulan no sa loron ne'e mak seidauk determina, tanba nia rasik mak sei determina loron no fulan atu mai vizita ne'e”, deklara nia. (*)