Diretór Servisu Edukasaun Munísipiu Baukau, Augosto Ornai Ximenes, hatete, eskola maioria iha ona kondisaun minimu, maibé balun aat tebes.
"Ita mós rekoñese eskola númeru oituan mós sei iha kondisaun mizeravél tebe-tebes, eskola lubuk ida sa'e ba kelikai, hanesan EBF Uaikulu, EBF Katólik Afaça, EBF Saraida, EFB Laualiu, EBF Sarbata prezisa investe infraestrutura, ita bele dehan husi 200 ital eskola, ida mizeravél tebes kuaze 20 ital," dehan Augosto iha kna'ar fatin vila nova, tersa (05/04).
Maibé, iha tinan-2021, Governu liuhusi MEJD fó ona projetu liuhusi Programa Konstrusaun Reabilitasaun Infraestrutura Edukativu (PKRIE) ba eskola 29 iha Baukau.
Nune'e, servisu edukasaun Baukau, kontinua planu ba tinan-2022 nian, liuhusi identifikasaun ba kada eskola ne'ebé konstrui iha tempu indonezia atu aprezenta ba MEJD iha tempu badak.
Tanba, eskola ne'ebé konstrui husi tempu indonezia, kuaze meza kadeira iha laran hodi estudante uza, maibé kondisaun uma grave.
"Ita tau ba planu, balun mak PKRIE tama ne'e, ida ne'e nian mós (kondisaun eskola 20 resin) Minisitéiru sei aprova tán lista la to'o 30 ba mós pelu menus," nia argumenta
Eskola ne'ebé atu tama ba projetu PKRIE iha tinan-2022 nia parte seidauk bele esklarese ba públiku, tanba foin halo identifikasaun ba kada eskola, hafoin aprezenta ba MEJD.
Alende ne’e, enkoraja grupu komunitáriu sira atu implementa projetu PKRIE 29 ba tinan-2021 nian ho di'ak, atu bele hetan nafatin konfiansa husi MEJD hodi rejolve infraestrutura edukativu iha Munísipiu Baukau.
Sorin seluk, enkaregadu kordenadór eskola ensiñu báziku filial (EBF) Lutumutu Tirilolo, Artur Soares, mós husu ba MEJD tau matan no harii edifísiu foun, nune'e bele hadi'a kualidade edukasaun iha Timor-Leste.
Maske kondisaun eskola EBF Lutumutu Tirilolo mak aat, maibé hanesan profesores kontinua iha vontade hanorin estudante sira hodi hadi'a kualidade edukasaun.
"Eskola ne'e kalen anin loke tiha ona, kalen balun aat no kuak ona, ai sira, liu-liu didin sira ne'e tinan ida tán labele ona," nia argumenta
Estudante iha eskola EBF Lutumutu Tirilolo husi primeiru anu to'o sestu anu hamutuk 181, enkuantu sala ba estudante hamutuk 3, nune'e difikulta iha prosesu aprendisajem, obrigatóriu tenke fahe ba turnu rua, parte dader no loraik.
Totál eskola iha Munísipiu Baukau husi Pre-eskolár to'o ensiñu sekundáriu no tekníku vokasionál hamutuk 243, kompostu husi pre-eskolár 30, ensiñu báziku 185, ensiñu sekundáriu jerál 23 no tekníku vokasionál iha 5. (*)
