“Ami hakarak hatete, ami fiar katak projetu komunitáriu ba eskola 200-resin nene'e maizomenus, setembru-outubru nene'e remata ona ninia konstrusaun”, dehan nia hafoin audénsia públika ba Proposta Orsamentu Retifikativu billaun $1.129 iha plenária PN, kuarta (04/05).

Maske durante audénsia públika, deputada Maria Fernanda Lai, foti kestaun liga ba orsamentu ho kategória transferénsia públiku iha Banku Nasionál Komérsiu Timor-Leste (BNCTL).

Maibé tranferénsia públika ne'e, atu halo konstrusaun ba projetu komunitáriu eskola hamutuk 203, ne'ebé la inklui sala ba profesór sira, no sentina (Casa de Banho).

Totál orsamentu ne'ebé prevee ba projetu ne'e ho valór hamutuk millaun $20.7, atu konstrui eskola 203 iha teritóriu laran tomak.

Dadaun MEJD mós transfere ona osan ho pursentu 25 ba grupu komunitáriu sira, no iha prosesu ida ne'e, enfelismente iha ida ka rua mak enfrenta hela problema kona-ba kestaun rai.

“Ha'u ba ne'eba, ne'e kestaun rai, ida iha Atsabe ne'eba rai monu, maibé serka de 200 ne'ebé agora prosesu la'o tiha ona, e pursentu 25 husi orsamentu ne'e transfere ona ba grupu komunitáriu, e balun ne'ebé ezekusaun liu ona pursentu 25, halo ona transferénsia pursentu 50”, hatete nia.

Husi konstrusaun hirak ne'e, bele haree ona ninia progressu iha kraik, iha suku, aldeia, ne'ebé agora dadaun la'o hela, agora atinje ona pursentu sanulu-resin-lima.

“Kualidade konstrusaun ha’u hanoin deputadu sira bele haree materiál hotu teste laboratóriu, fatuk, rai henek, zinku, buat sira ne'e hotu teste iha laboratóriu”, afirma nia. (*)