Tempotimor (Baukau)‐Mestre na’in-rua iha Munisípiu Baukau desidi ba buka moris iha estranjeiru, tanba konsidera sálariu iha Timor-Leste la sufisiente.

Mestre na’in-rua ne’e, ida durante hala’o hela ninia profisaun nu’udar manorin-na’in iha eskola sekundária públiku númeru 02 vila nova Baukau, no ida seluk husi eskola eñsinu báziku katólika Laga-Samalari.

"Iha rua, ida funsionáriu permanente ida kontratadu, sira sente katak, saláriu ne'ebé sira simu labele sustenta sira nia moris entaun sira deside ba tiha", dehan Diretór Servisu Edukasaun Munisípiu Baukau, Augosto Ornai Ximenes, iha salaun administrasaun Baukau, Tersa (27/12).

Tanba ne’e, Servisu Edukasaun Munisípal halo ona prosesu suspensaun ba sira na’in-rua, tanba husik kna'ar sein iha koñesementu ba parte relevante liuhusi karta ruma.

Situasaun ne’e halo mestre iha Munisípiu Baukau, hahú menus iha eskola sira, tanba balun husik kna'ar ba buka servisu iha rai liur, balun idade avansadu, balun hetan moras no mate.

"Agora inisiu do anu ita iha difikuldade, eskola barak nia profesores menus ba beibeik, tanba idade, tanba moras, tanba mate", nia dehan.

Alende ne’e, Ministéru Edukasaun Juventude no Desportu (MEJD) liuhusi ékipa tekníku halo ona verifikasaun dadus ba mestre tempu parsial sira nian iha teritóriu nasionál, no konsege termina hein dezisaun final ba anúnsiu rezultadu husi MEJD.

"Atu dehan Baukau iha 600-resin profesores tempu parsiais mak tama iha prosesu verifikasaun," nia informa

Entretantu mestre kontratu husi Baukau, kompostu husi eskola pré-eskolar to'o eñsinu tekníku vokasionál, públiku no privádu hotu. (*)