Manorin-na’in voluntáriu iha Eskola Sekundária Jerál Katólika São João Bosco do Reino De Venilale, Elisabet Luis de Andrade dehan, politika MEJD nian ba rekrutamentu prioridade liu ba mestri sira ne’ebé hanorin voluntáriu iha eskola públiku sira no la tau importansia ba eskola katólika.
“Ami nia preokupasaun kona-ba rekrutamento ne'ebé halo husi Ministériu Edukasuaun, nu'udar manorin voluntária la satisfas ho rekrutamentu refere, sente diskriminasaun, tanba la halo balansu ba manorin sira ne'ebé hanorin iha eskola privadu no eskola públiku sira, maibé fo prioriedade liu ba eskola públiku, senti duvida sera que ami sira ne'e sidadaun Timoroan ka lae no estudante sira ne'ebé ami hanorin sidadaun Timor ka lae”, dehan nia, iha venilale, tersa (27/12).
Tuir ninia observasaun katak, realidade iha eskola privadu sira nia didikasaun ba estudante sira mós hatudu rezultadu di’ak iha Timor-Leste.
Nune’e, hakarak sujere ba Ministériu Edukasaun Juventude no Desportu, atu halo levantamentu ka verifikasaun ba dadus rekrutamentu, tenke balansu ba manorin-na’in sira hotu iha eskola púbiku no privadu.
“Ministériu Edukasaun tenke tau mós konsiderasaun ba ami manorin-na’in sira ne’ebé hanorin iha eskola privada ka katólika”, nia sujere.
Nia afirma, ekipa husi MEJD mai to’o ona Venilale halo verifikasaun, maibé sira fo liu prioridade ba mestri sira ne’ebé voluntáriu iha Eskola Públiku.
“Mai to’o ona iha ne’e halo hotu verifikasaun, maibé iha rekrutamentu fo liu prioridade ba eskola públiku”, nia akresenta
voluntáriu na’in-11 ne'e, balun hahú hanorin iha tinan 2015, iha 2017, iha 2018, iha 2019 no balun hahú iha tinan 2020.
Total mestre volutáriu iha Sekundária Jerál Katólika São João Bosco do Reino De Venilale, hamutuk ema na’in-11, ne’ebé kompostu husi Mane na’in-5 no Feto na’in-6.
Maibé, Diretór Servisu Edukasaun Munisípiu Baukau, Augosto Ornai Ximenes hatete, Ministéru Edukasaun Juventude no Desportu (MEJD) liuhusi ékipa tekníku halo ona verifikasaun dadus ba mestre tempu parsial sira nian iha teritóriu nasionál, no konsege termina hein dezisaun final ba anúnsiu rezultadu husi MEJD.
"Atu dehan, Baukau iha 600-resin profesores tempu parsiais mak tama iha prosesu verifikasaun," nia informa
Entretantu mestre kontratu husi Baukau, kompostu husi eskola pré-eskolar to'o eñsinu tekníku vokasionál, públiku no privádu hotu. (*)