Tuir Mandati, kada aula ida tenke iha de’it estudante másimu na’in 30. Nune’e, bele iha disiplina atu aprende oinsa mak bele sai edukador ida iha eskola sira.

"Ohin ita ko’alia kona-ba alunu sira iha sala ida, ninia ideal ne'e mak na’in 30, Mais kuandu ita sulan hamutuk to'o na’in 40 ka 50 iha aula ida, sei hamosu de'it problema, liu-liu la fasilita profesór sira atu halo avaliasaun ne'ebé di’ak ba estudante sira,” dehan deputadu Mandati iha Plenária Parlamentu Nasionál (PN), Segunda (22/2).

Nia mós dehan, hakarak eskola la'o ho di’ak, dahuluk liu, la'ós de'it hakarak forma ema sai doutór, enjiñeiru ka buat seluk tan, maibé forma ema para sai edukadu.

"Ita la’ós forma ema para sai de’it doutór, enjiñeiru no seluk tan, maibé ita tenke forma ema hodi sai ema edukadu. Ha’u koalia ne'e tanba ema ida formandu de'it la edukadu, ne'e ninia formandu no nia arogánsia mosu," katak Mandati.

Iha fatin hanesan deputadu PLP, Abel Pires mós husu ba governu atu hadi’ak kondisaun eskola iha timor laran, tanba konsidera eskola hirak ne'e nu’udar investimentu futuru jerasaun sira nian.

“Orsamentu ba konstrusun eskola ne'e bele gasta liu millaun $100 para kondisaun eskola sira bele garantia ba tinan naruk nian, duké hasai osan tau ba Sesta Bázika hodi investe loron ohin de'it,” dehan Abel.

Hatan ba kestaun ne'e, Ministru Asuntu Parlamentar no Komunikasaun sosial (MAPKomS) Francisco Jeronimo katak, preokupasaun hirak sei enkamina ba Ministériu Edukasaun Juventude no Desportu atu bele buka solusaun.(*)