Ministru Ensinu Superior Siénsia no Kultura, Longuinhos dos Santos hatete, aula rekuperasaun ne’ebé sei aplika ba estudante ne’ebé laiha leptop no telefone android, nu’udar oportunidade ida ba estudante sira atu asesu molok instituisaun sira halo avaliasaun ba sira-nia rezultadu estudu.

“Agora kuandu estudante sira ne’ebé mak laiha android, leptop, no sira seluk, ne'e e depois situasaun ne'e hotu normaliza, entaun sira uza buat ida ema temi dehan aula rekuperasaun, atubele re-hikas aula molok hala'o avaliasaun ba estudante sira”, hatete nia liuhusi audénsia ho Komisaun G trata asuntu edukasaun iha Parlamentu Nasionál (PN), kinta (17/06).

Pozisaun Governu rekoñese durante konfinamentu obrigatóriu fó konsikuénsia maka’as ba estudante sira ne’ebé laiha fasilidade.

Maibé, iha metodolózia rua ne’ebé mak implementa ba ensinu superior públiku no privadu sira atubele ativa aula, liuhusi meiu online inklui aula rekuperasaun.

“Los duni ne'e preokupa los, purtantu iha prosesu implementasaun serka sanitária no konfinamentu obrigatóriu, instituisaun superior públiku no privadu sira iha preokupasaun atu oinsá mak nafatin implementa atividade aula”, afirma nia.

Aliende ne’e deputadu Komisaun G trata asuntu edukasaun, Gabriela Alves husu ba Ministériu Ensinu Superiór no Siénsia Kultura (MESSK) atu esplika kestaun kona-ba estudante universitáriu sira ne’ebé durante ne'e laiha fasilidade atu asesu ba prosesu aprendijazen online iha ambitu Konfinamentu Domisiliáriu Jerál iha Dili.

“Bazeia ba realidade ne’ebé iha, señor ministru bele esplika kona-bá asesu aula online ne'e, tanba oras ne'e estudante barak mak fila ba foho ona, iha fatin balun realidade hatudu katak estudante barak mak laiha telephone”, dehan nia.(*)