Portavoz Revelino Elias Guterres hatete, nu'udar grupu univesitáriu iha Timor-Leste hamutuk kontinua manifesta interese kbi’it la’ek no lian la’ek sira-nia interese iha kualkuer espasu ho plataforma saida de'it.

Iha sorumutu ho Prezidente Repúblika hodi ko'alia relasiona problema ekonomia, edukasaun no problema oioin ne'ebé iha kauza husi pandamia Covid-19.

“Ami lori kestaun hirak ne'e mai hato'o ba Prezidente Repúblika, oinsá mak Prezidente Repúblika bele utiliza ninia kompeténsia atu bele hatutan aspirasaun ba orgaun ne'ebé relevante hodi solusiona, buka alternativa ne'ebé di'ak ho lais atu responde problema sira ne'ebé ohin ami ko'alia”, dehan nia hafoin reuniaun ho Prezidente Repúblika iha Palásiu Prezidensiál Bairopite, kuarta (11/08).

Tanba estadu implementa ona polítika oioin atu salva sidadaun sira maibé iha parte seluk, mosu problema sosiál no ekonomia iha povu ho klase baixa ne'ebé laiha rendimentu atubele sustenta sira-nia nesesidade bázika.

Nune'e iha mós problema ne'ebé estudante sira infrenta diretamente, durante edukasaun paradu.

“Governu konsege impoin duni alternativa aula virtual ou aula online maibé ida ne'e la efetivu tanba estudante barak mak la asesu tanba kestaun ekonomia”, afirma nia.

Costantinho de Jesus hatutan, polítika Governu atu fó subsídiu no pulsa gratuita maibé kona-ba propina ladún iha problema tanba bele aloka diretamente tuir lista ne'ebé aprezenta husi administrasaun.

“Problema oituan iha pulsa internet gratuita ninian tanba estudante barak mak la asesu inklui ha'u rasik la hetan pulsa husi operadór Timor Telecom, Telkomcel ho Telemor”, hatete nia.

Entretantu iha dinamika diskusaun Prezidente Repúblika hatete, problema ne'ebé durante ne'e hasoru la'ós kauza mak pandamia globál, maibé ida ne'e tanba problema ekonomia no polítika ne'ebé la prepara ho di'ak desde Timor ukun rasik-an. (*)