"Ohin ita lansa ita-nia programa Governu iha povu nia leet, liuhusi programa naroman ba suku iha Nahareka, atu komunidade sira asesu ba informasaun no fahe informasaun kona-ba potensialidade iha suku Nahareka ba públiku, inklui asesu prosesu dezenvolvimentu hodi kontribui ba Prosesu dezenvolvimentu iha suku no iha postu to’o iha nível nasionál”, dehan Ministru Francisco Martins, iha sede suku Nahareka, kinta (07/10).
Programa ne'e, nu'udar prioridade Governu ho intensaun atu lori informasaun besik ba komunidade sira iha área rurál hodi fó mós oportunidade ba komunidade hato'o preokupasaun no obstakulu ne'ebé hasoru durante ne’e.
"VIII Governu konstitusionál, hakarak investimentu konsentra iha ema, nune'e hodi mobiliza malu no hato'o preokupasaun no atividade sira, liuhusi informasaun ba públiku, atu hatene potensialidade iha suku Nahareka”, afirma nia.
Tanba ne'e MAPKomS sei haruka nia ekipa tékniku sira, fó kapasitasaun ba jovem sira iha suku Nahareka, atubele jere sentru informasaun kona-ba hakerek, halo vídeo no hasai fotografia, hodi partilla potensialidade iha suku ba nível nasionál.
MAPKomS mós agradese ba komunidade suku Nahareka ne'ebé simu programa naroman ba suku ho haksolok, tanba bele fasilita sira asesu informasaun.
Xefe suku Nahareka, Paulino A.Ximenes, lori komunidade suku Nahareka tomak agradese Governu, tanba bele hili ona sira-nia suku, hodi implemeta programa Naroman ba suku.
"Ha'u lori komunidade Nahareka tomak, agradese ba Governu tanba hili ona ami nia suku hodi implemeta programa ne'e”, dehan nia.
Nune'e Xefe suku Nahareka kompremetidu, sei hamutuk ho komunidade sira hodi asegura sentru informasaun ne’ebé Governu kria:
"Ha'u sei hamutuk ho populasaun hodi asegura implementasaun programa ne'e, atubele susesu no promove potensialidade iha suku Nahareka ba nível nasionál”, afirma nia.
Partisipa iha atividade ne'e, Ministru MTKI, Xefe Gabinete SEKOOP, Prezidente TIC Timor,I.P, Prezidente TATOLI,I.P, Inspetór Gabinete Inspesaun MAPKOMS, Diretór Nasionál no Koordenadór sira, Sekretáriu Administradór Munisípiu Vikeké, Adjuntu Komandante PNTL Munisípiu Vikeké, Administradór Postu Administrativu Ossu, Autoridade Lokál no komunidade sira. (*)
