“Festivál kultura múzika rezisténsia parte ida husi kumprimisu Prezidente Repúblika nian, oinsá atu haburas no hametin identidade nasionál. Iha rezisténsia la’ós de’it ema lori kilat maibé lori arte, múzika no pintura hotu, halo rezisténsia ba ita-nia luta durante tempu naruk, tanba ne’e iha sosiedade ida iha karateristika rasik, mak nia identidade, nia kultura rasik ba espresaun iha ninia arte sira”, dehan Xefe Kaza Sivíl, liuhusi komunidade imprensa ne'ebé www.tempotimor.com, kuarta (29/12).

Iha faze finál konkorente hamutuk na’in-13 mak kompete, depois aprezentasaun kanta, juri deside tuir valór ne’ebé mak iha, na’in-6 mak hetan valór di’ak liu no manán iha festival tinan-2021 no na’in-ida manán ho favoritu.  

“Manán ka lakon la’ós objetivu primeiru liu, maske ida ne’e importante, maibé importante liu oinsá atu haburas, hametin ita-nia identidade husi ita-nia kultura rasik. Prezidente Repúblika Francisco Guterres 'Lú Olo', tau matan ba joven sira, joven sira ne’e mak futuru ba nasaun, joven sira ne’e mak sei habelar no hametin ita-nia rain rasik no ba mundu internasionál. Ita-boot sira hatudu ba joven sira rihun ba rihun iha Timor katak ita-boot sira mak futuru ba rai ida ne’e", hatete nia.

Kontestante na’in-7 ne’ebé mak hetan valór di'ak no sai manán na’in mak hanesan: Renizia da Costa Neves (primeiru-lugar), Efigenia Z. Fernandes (segundu-lugar), Nikel dos Santos (Terseiru-lugar), Amancia J. de Araújo (kaurtu-lugar), Lamberto T. dos Santos (Kintu-lugar), Adriano (sextu-lugar) no Isamara P. C. F. Alves (favoritu).

“Ha’u hakarak hato’o ba ita-boot sira ne’ebé mak hetan primeiru-lugar no segundu-lugar, itaboot sira mak mellor iha episode festival tinan-2021, sira ne’ebé mak seidauk hetan, ne’e kestaun tempu deit, dejafiu ba ita-boot sira para atu buka di’ak liután", afirma nia.

Kompetisaun ne’e realiza husi Prezidénsia Repúblika koopera ho Sekretáriu Estadu Juventude no Desportu, Sekretáriu Estadu Arte no Kultura, Ministériu Administrasaun Estatal no tve. (*)