Tempotimor (Dili) – Terminal ba transporte públiku iha Kapitál Dili sai preokupasaun públiku. Terminal hirak ne'ebé durante ne'e Governu halo rehabilita, barak mak la funsiona tanba kondisaun ne'ebé ladi'ak.

Tuir Ministru Transporte no Komunikasaun (MTK), José Agustino da Silva, konstrusaun terminal ba transporte públiku iha parte Hera, Manleuana no Tibar sei iha prosesu estudu viabilidade.

"Dadaun ne'e, sei iha prosesu estudu viabilidade hela. Liuhosi estudu ne'e, sei define kustu hira. Klaru katak ne'e planu Governu nian. Nune'e, iha tinan 2020 ne'e ita hahú ona. Tanba ita iha estasaun rejionais nian. Entaun, parte Leste nian sei halo iha Hera, parte rai klaran nian sei halo iha Manleuana no parte Oeste nian sei halo iha Tibar," dehan MTK iha Palásiu Governu, Kuarta (13/11/19).

MTK afirma, husi vantajem tau terminal ba transporte públiku iha fatin hira ne'e, bele loke luan tan  Sidade Dili.

"Vantajem ba ita mak loke tan espasu Dili nian, halo luan. Ne'ebé fó espasu ba ita nia transporte públiku nia movimentasaun no parte ida, bele aumenta sira nia kresimentu ekonomia," haktuir José.

Entretantu, hatán kona-ba totál orsamentu ne'ebé prevé ba konstrusaun terminal hirak ne'e, MTK la fó sai. Nia so hatete de'it katak projetu ne'e prevé iha 2020.

“Tanba halo modelu terminal oinsá, presiza osan hira, se mak halo ne'e ita seidauk hatene. Ne'ebé depende ba estudu viabilidade," José afirma.

Tempotimor (Díli) – Hodi apoiu servisu julgamentu iha munisípiu, Sesta (06/09/19), Prokuradór Jerál Repúblika (PJR), José da Costa Ximenes fó posse ba sekretáriu área judisiál nain 7.

"Ohin halo nomeasaun ba kargu sekretáriu sira, depois sira tuir formasaun iha fulan Fevereiru. Ohin sira na'in hitu simu posse, no sira nia deslokasaun ne'e iha loron 1 Setembru 2019 ba munisipiu Covalima, Baucau, Dili inklui Rejiaun Espesial Oe-Cusse. Sira na'in hitu Ministeriu Publiku nomeia hanesan sekretáriu superior," informa PJR Jose Ximenes ba jornalista iha salaun Ministériu Públiku, Sesta (06/09/19).

PJR fó parabens ba pesoál sekretáriu na'in hitu ne'ebé simu pose no korajem sira atu servisu ho justu, inklui apoiu ho di'ak ba juis sira iha munisípiu ne'ebé sira desloka ba.

Paulina de Araujo Correia, ne'ebé asume knaar hanesan Sekretária Konsellu Superiór, sente orgullu ho kargu ne'ebé Ministériu Públiku fó fiar.

Entretantu, pesoal sekretáriu sira ne'ebé simu pose ne'e promete sei hala'o servisu tuir lei no normas sira ne'ebé mak estabele no la involve mós interese privadu iha servisu judisiariu.

Sekretáriu na'in hitu ne'ebé hetan pose husi PJR mak hanesan; Paulina de Araujo Correia, Martinho Caet, Dominica Martins, Eliana Flora Pereira, Jose Carlos Antonio, Valente Salsinha no Recardina da Costa Ximenes.

Tempotimor (Díli) – "Ita atu halo prevensaun ka kontrolu ba moras la hada'et, ita tenke konsumu ai-han hirak ne'ebé saudavél. Ita moris iha ambiente ida ne'ebé moos no dook husi sigaru suar, hodi bele  saudavél nafatin," hatete Prezidente Autoridade Munisípiu Díli, Gaspar Soares bainhira partisipa Konferensia Semana Mundiál, iha Kaikoli, Sesta (06/09/19).

Gaspar dehan, objetivu husi Konferensia Semana Mundiál ne'e, atu bolu komunidade tomak liuliu komunidade sira iha Munisípiu Díli atu fó atensaun di'ak liután hodi halo prevensaun moras la hada'et iha Munisípiu Díli.

Gaspar mós husu ba komunidade Munisípiu Díli, tenke servisu hamutuk hodi fó atensaun, halo prevensaun no kontrola moras la hada'et liuliu iha Munisípiu Díli.

Iha fatin hanesan, Prezidente Autoridade Munisípiu Ermera, Jose M. S. Soares (PAME) hateten, saúde saudavél presiza hadook-an husi moras oioin ne'ebé mosu ona iha rai laran.

"Saúde saudavél  tenke konsumu ai-han  ne'ebé moos, hodi nune'e labele hetan moras hanesan ran midar, pulmaun no seluk tan. Tanba ne'e, tenke prevene konsumu ai-han  ne'ebé mina barak, masin, ai-manas no seluk tan. Inklui halo jinastika barak," Soares hatete.

Tempotimor (Dili) – Ministru Estadu Prezidensia Konsellu Ministrus (MEPKM), Hermenegildo Agusto Cabral Pereira informa, kona-ba sistema Autoridade Marítima Nasionál (AMN) ne'ebé sai matéria diskusaun iha Konsellu Ministru, Kuarta (16/10/19) iha Palásiu Governu, Dili.

Tuir MEPKM, Ministru Defeza no Seguransa (MDS), Filomeno Paixao de Jesus rasik, aprezenta asuntu ida ne'e la'o durante tinan barak liubá kotuk no prosesu diskusaun mós la'o.

Governante ne'e afirma, iha diskusaun ne'e KM fó opsaun tolu ba Ministru Defeza no Seguransa hodi rona no hare pro no kontra. Nu fim KM rekomenda ba ministru defeza hodi kontinua halo abordazen ho entidades iha ita nia rain.

"Hodi hakle'an liután komprensaun iha ita nia setór defeza interiór, alfandega, elementu hotu-hotu ne'ebé integra iha setor ida ne'e bele intende kle'an ona, hodi filafali mai KM hodi simu aprovasaun final," esplika Agio Pereira.

Sistema Autoridade Marítima Nasionál konsidera mós tasi hanesan identifikasaun iha estratejia  nasionál  setór fundamentál ba dezenvolvimentu nasaun.

"Sei estuda mós kona-ba opsaun tolu ne'e ba Autoridade Marítima Nasionál (AMN), ho objetivu atu poteziar pozisaun geoestratejika nasionál ho jestaun ne'ebé efikaz husi valiozus rekursus ne'ebé  eziste iha espasu marítima no asumi responsablidade husi estadu kosteriu iha kapítulu seguransa marítima no protesaun iha meiu ambiente," deklara Agio.

Tempotimor (Dili) –  Asosiasaun Juventude Nahareka (AJN), husu Governu atu tau atensaun ba komunidade Suku Nahareka, Postu Administrativa Ossú, Munisípiu Vikeke ne'ebé durante tinan sanulu resin ona, halerik nafatin kona-ba infraestrutura, liuliu estrada ne'ebé liga husi Ossú ba Suku refere.

Vise Koordenadór AJN, Joselino do Rosario Ximenes katak, Suku Nahareka dezde tempu uluk to'o mai ohin loron, seidauk asesu ba estrada, be moos no eletrisidade. Tanba ne'e, nia husu ba Governu atu tau matan mós ba povu Nahareka.

"Komunidade Nahareka dadaun ne'e, sei uza solar panel iha tempu kalan. Nune'e mós kondisaun estrada ne'ebé la di'ak, fó impaktu tebes. Susar ba komunidade atu lori nia produtu lokál hodi asesu ba merkadu iha postu no munisípiu," dehan Joselino iha jardin Fransisco Borja da Costa, Dili, Domingo (29/09/19).

Entretantu, iha fatin hanesan José Martins nu'udar membru AJN afirma, estrada, eletrisidade no bee moos to'o agora komunidade sidauk hetan asesu. Maski, tuir José, iha suku balun komunidade asesu ona infraestrutura báziku hanesan estrada, eletrisidade no bee moos. Nia dehan, so komunidade Nahareka rasik to'o agora seidauk hola parte iha dezenvolvimentu.

Nia mós afirma, nu'udar jerasaun foun Suku Nahareka nian, husu ba Governu atu haree ba povu nia moris ne'ebé seidauk hetan asesu ba dezenvolvimentu.

"Ami Juventude hanesan liman, ain, tilun no matan ba komunidade atu hato'o ba Governu atu rezolve problema sosiál sira ne'ebé komunidade emfrenta iha baze," katak Martins.

Komunidade Suku Nahareka, moris ho produtu lokál sira hanesan Bua, Nuu, Kamii no seluk tan. Maski nune'e, to'o agora, povu iha suku refere seidauk bele asesu merkadoria hanesan suku sira seluk, ne'ebé hetan ona infraestrutura di'ak.

Tempotimor (Dili) – Bankada Uniaun Demokrátika Timorense no Frente Mudansa (UDT/FM) iha Parlamentu Nasionál (PN), preokupa ho proposta Orsamentu Jerál Estadu (OJE) tinan 2020, ne'ebé Governu liuhosi Konsellu Ministru aprova boot liu.

"Ha'u foin haree iha jornal. Haree katak proposta Orsamentu Jerál Estadu tinan 2020 sa'e ba billaun $1.95. Ha'u mós preokupa tanba orsamentu ne'e atu gasta ba saida?" dehan Deputadu Gilman Exposto iha Parlamentu Nasionál, Kinta (03/10/19).

Nia afirma, nu'udar reprezentante povu iha PN, nia sei haree iha prosesu debate orsamentu iha plenária.

"Nu'udar deputadu, ami sei haree buat saida mak presiza atu gasta duni husi osan ne'e. Se buat ruma la presiza, ami iha direitu para atu husu ba Governu para ko'a hodi orsamentu ne'e labele sa'e," Gilman afirma.

Reprezentante povu ne'e mós dehan, husi orsamentu ne'ebé boot ne'e bele fó impaktu ba fundu úniku ne'ebé fornese ba estadu.

"Konserteza, OJE ne'e fó duni impaktu ba ita nia fundu úniku. Maibé, ita mós presiza haree ba katak buat barak mak presiza hadi'a iha ita nia rai. Liuliu ba dezenvolvimentu ne'ebé fó impaktu ba povu," nia esplika.

Alende ne'e, deputada Elena Martins husi bankada FRETILIN katak, nu'udar reprezentante povu iha PN, nia sei ezerse funsaun hodi haree bainhira orsamentu tama ona iha Parlamentu Nasionál.

"Bainhira OJE mai ona iha PN, espera ami hotu iha konxiénsia para haree. Tanba, osan montante boot liu mak bens no servisu no foin primeira vez OJE liu fali tetu do estadu," deputada Elena dehan.

Tuir Elena, OJE 2020 nian sa'e ba billaun $1.95, signifika atu ba billaun rua ona no laiha sustentabilidade.

Tempotimor (Dili) – Deputadu José Pacheco Soares kondena parte kompetente balun, ne'ebé fó fali foos ne'ebé aat ka nia tempo liu ona, ba estudante Ensino Báziku (EB) konsumu, iha programa merenda eskolar.

“Foos ne'ebé tempu liu ona ka laiha kualidade, labele uza ba merenda eskolar ka fó ba estudante sira han. Tanba ida ne'e bele afeita ba estudante sira nia saúde,” deputadu ne'e hatete iha Parlamentu Nasionál Tersa (01/10/19).

Tuir deputadu husi Bankada FRETILIN ne'e, foos sira ne'ebé aat no nia tempo liu ona, tenke foti desizaun no halo kordenasaun ho diretór edukasaun munisípiu, para soe tiha foos aat ne'e. Ka fó ba komunidade ninia fahi.

“Foos ne'ebé hetan estragus ne'e tanba menus kontrola ba armajen ne'ebé rai foos ba. Tan ne'e, presiza halo kontrola para hatene sasán ne'ebé mak rai kleur ona no foin tama, ita tenke hatene,” nia dehan.

Entretantu, Prezidente  Komisaun G, Sabino Soares ‘Guntur’ hatete, kondisaun foos hirak ne'ebé aat ona no akontesimentu sira hanesan ne'e loloos labele akontese tan.

"Akontesementu sira hanesan ne'e, loloos labele akontese ona. Tanba, problema sira ne'e akontese  beibeik ona i públiku hotu kestiona. Tansá seidauk rezolve buat hirak ne'e," Guntur afirma.

Tempotimor (Díli) – Ekipa Avaliasaun husi ASEAN Fact-Finding Mission (FFM) apresia Timor-Leste nia avansadu ne'ebé iha, nune'e posibilidade tempu besik TL sai ona membru ASEAN.

Diretór Jerál  Asuntu ASEAN, Ministériu Negósiu Estranjeiru no Kooperasaun (MNEK), Jorge Trindade Camoes liuhosi Konferensia Imprensa ne'ebé hala'o iha salaun VIP Aeroportu Internasionál Nicolau Lobato katak, ekipa avaliasaun husi ASEAN hakfodak haree Timor nia kapasidade.

"Ekipa ida mai ne'e, husi parte polítika no seguransa. Sira mai rekolla dadus kona-ba polítika  no seguransa ita nian. Nune'e, iha diskusaun ne'e ita dehan ba sira katak ita presiza timeline ida ne'ebé sertu, para ita adere no sai membru ba ASEAN," informa Jorge Trindade ba jornalista, Sesta (06/09/19).

Nia afirma, ekipa Fact Finding Mission mós apresia ba Timor-Leste nia kapasidade. "Liuhosi organiza eventu ne'e, seguransa no atendimentu inklui mós sira seluk. Sira mós impresonadu katak buat ne'ebé ita halo ne'e liu saida mak sira hanoin. Tanba, sira hanoin katak ita la konsege organiza eventu ne'e ho di'ak," nia esplika.

Ba ekipa husi ASEAN ne'e, Timor-Leste mós promete sei esforsu nafatin atu nune'e bele sai duni membru ASEAN, iha tempu ne'ebé tuir mai.

Hadi'a Ekonomia 

Ekipa Fact-Funding Mission, nu'udar ekipa avaliador ba nasaun ne'ebé  atu sai membru ASEAN, inklui Timor-Leste rekomenda atu hadi'a parte ekonomia iha rai laran, hodi nune'e bainhira TL sai membru ASEAN, ekonomikamente TL preparadu ona.

"Seitor ekonomia importante teb-tebes. Ne'ebé, ha'u hanoin iha tempu badak ita haree oinsá iha ekipa ida halo estudu hodi rekolla dadus sira ne'ebé presiza, para hakat ba oin hodi negosia ho sira kona-ba área ekonomia ninian," tenik Jorge.

Iha fatin hanesan, nia mós hato'o agradesementu ba média nasionál ne'ebé durante ne'e públika sai ona informasaun kona-ba avaliasaun Timor-Leste nian husi ekipa Fact-Finding Mission.

"Ba maluk jornalista sira, ami agradese teb-tebes tanba ita boot sira bele halo publikasaun atu ita nia sosiedade bele akompaña prosesu ne'e tomak, sira mós iha koñesimentu saida mak la'o hela no komunidade mós hatene ekipa Fact-Finding Mission iha ne'e," Jorge espresa.

Iha biban ne'e, Jorge husu ema hotu atu akompaña prosesu Timor-Leste nia adezaun ba ASEAN.

Tempotimor (Díli) – Komité Populár, Tersa (10/09/19) iha Sede Komité 12 Novembru, Balide, Díli kondekora prémiu populár ba ativista diretus umanu, Saskia Kouwenberg.

“Ha'u sente orgullu tebes, tanba sai hanesan parte ba luta independensia Timor-Leste ninian.  Nu'udar feto, ho aten brani tebes hodi bele sai parte husi luta ba independesia nasaun Timor-Leste nian," Saskia Kouwenberg hatete bainhira simu Prémiu Populár husi Komité Populár.

Saskia, feto Olanda ida ne'ebé brani duni. Ho ninia brani, Saskia konsege lori sai husi Timor, kasete gravasaun video Max Stahl nian iha Santa Cruz. Sei la'ós tan Saskia, mundo internasionál sei la hatene, saida mak akontese iha masakre Santa Cruz, 12 Novembru 1991.

Iha fatin hanesan, Símbolu Solidariedade Timor-Leste, Maria de Lourdes Martins da Cruz (Mana Lu) hatete, nu'udar feto Timoroan ho fuan brani hodi organiza povu iha area rurais hodi bele kontribui ba Timor.

"Iha tinan 20 liu ba, ha'u mós iha misaun ida hodi harii programa prepara ema hodi tulun povu iha área rurais, durante luta ba independensia," dehan Maria de Lourdes.

Nia husu ba Timoroan hotu, liuliu ba jerasaun foun tenke estuda hodi hatene nia identidade rasik, nu'udar Timoroan. "Nu'udar joven, tenke badinas estuda hodi nune'e bele hatene istória no identidade nasaun Timor-Leste ne'e nian."

Tempotimor (Dili) –  Sensus Agrikola ne'ebé hala'o durante fulan ida ona foin mak atinje % 22. Maski, membru sira difikulta iha prosesu haruka dadus mai nasionál.

“Purtantu, ita haree ba progresu sira ne'ebé mak iha, to'o Segunda ita iha ona % 22 mak entrevistadu ona. Tuir loloos besik fulan ida ona, tenke atinje pursentu 50. Maibé  to'o agora seidauk," hatete Diretór Jerál Estatísitika, Elias dos Santos Ferreira iha nia knaar fatin, Kaikoli, Dili, Tersa (10/09/19).

Nia informa, dadus husi suku sira ne'ebé tama ona iha nasionál  kuaze pursentu 80. Entaun, falta pursentu 11 mak seidauk tama. Maski nune'e, sensus agrikola tenke termina iha 12 Outubru 2019.

Hatán kona-ba difikuldade ne'ebé ninia membru sira hetan iha treinu, Elias hatete iha semana kotuk sira haruka ona sira-nia master training ba akompaña intervistador sira ne'ebé servisu iha munisípiu.

“Tanba intervistadór balun hetan problema kona-ba oinsá bele haruka dadus mai nasionál. Iha sensus ida ne'e ami uza teknolojia Computer Assistant Personal Interviewing (CAPI). Purtantu, entrevista iha dadeer, loraik ne'e haruka kedas mai nasionál," Elias haktuir.

Ministériu Agrikultura no Peskas (MAP) hamutuk ho Diresaun Jerál Estatístika hala'o Sensus Agrikula ba dahuluk iha Timor-Leste, depois Timor-Leste restaura nia independensia.

Anunsiu

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com