"Polítika governu ninian, sempre halo nusa maka liberdade espresaun, liberdade imprensa no liberdade, atu asesu ba informasaun iha Timor-Leste, ne'e laiha ida atu hapara, eh governante no governu sé de'it mak mai, nia tenke fo nafatin espasu apoia atu liberdade ida ne'ebé konsagra ona iha konstituisaun, tenke sai buat ne'ebé ita hothotu nian, e tenke realiza iha ita-nia atetude hotu iha nasaun ida-ne'e, importante mak ne'e, lei iha leten, ita hothotu hakru'uk ba lei," dehan Ministru Jerónimo liuhusi diskursu iha seminariu nasional, delta Nova, kinta (10/11).

Ministériu Asuntu Parlamentár no Komunikasaun Sosiál nu’udar ministériu foun ne'ebé harii iha oitavu governu konstituisionál, tinan 2020, ne’ebé atu haree asuntu sira ligadu ho meiu komunikasaun sosial nian.

Nune'e, governu tenke aumenta nafatin asesu demokrátiku ba meiu komunikasaun sosiál sira hotu, diversifika fontes sira ne'ebé ema hotu asesu ba no garante independénsia husi média, relasiona ho poder polítiku no ekonómiku.

Tanba, Liberdade Imprensa no meiu komunikasaun sosiál sira hanesan diretu ne'ebé konsagra ona iha artigu 41 husi konstituisaun RDTL, nune'e estadu tenke garante regulasaun média nian atu evita violasaun diretu fundamental no fo kontribuisaun atu haforsa nafatin seitor komunikasaun sosial nian.

La'os ne'e de'it, maibé inklui mos responsabilidade atu asegura Liberdade independensia husi orgaun públiku komunikasaun sosiál relasiona ho poder polítiku nomos atu garante ejisténsia servisu públiku rádiu no televizaun sira.

Iha artigu 16 husi dekretu lei númeru 20/2020, loron 28 fulan-maiu, alterasaun dahuluk ba dekretu-lei numeru 14/2018, loron 17 fulan-agostu, kona-bá orgániku oitavu governu konstituisional ba MAPKomS, nia funsaun atu halo komstepsaun, ezekusaun, koordenasaun, avaliasaun, polítika públika  ba área komunikasaun sosiál nian.

Nune’e, MAPKomS define ba prioridade boot hat, Dahuluk mak lejislasaun no rigorizasaun ne'ebé presiza ba área komunikasaun sosiál.

Daruak, haforsa seitor komunikasaun sosiál nian, hodi garante nia liberdade no independénsia, ida-ne'e governu iha komprimidu ida tenke reforsa duni seitor komunikasaun sosiál sira.

Datoluk, fo tulun ba komunikasaun sosiál atu promove identidade no kultura povu Timor-Leste nian.

Dahaat, garante superientidensia no tutela ba orgaun komunikasaun sosial, atu rezolve kualidade media iha Timor.

Nune'e, garante de'it konstituisional nian atu proteze ema hotu ninia diretu sira, liliu minoria sira, ne'e estadu tenke garante servisu públiku radiu no televizaun ho kualidade tuir lei ne'ebé ejiste iha TL maske presiza hadi'a bebeik.

Aleinde ne’e, Governu sei haree didi'ak mos ba kondisaun RTTL iha meiu komunikasaun sosial, tanba fo nia kontribuisaun ba dezenvolvimentu Timor-Leste nian no mos husi ajensia TATOLI no media metro FM no media privadu sira. (*)