Tanba, Munisípiu ne'ebé sai poténsial ba produsaun hare kulit mak hanesan, Munisípiu Baukau, Vikeke, Maliana, Suai, Manufahi inklui Manatutu, maibé traktór ne'ebé antes Governu anterior fahe, dadaun balun kondisaun grave labele halo operasaun.

 Nune'e, Governu sei sosa traktór 45 hodi distribui ba servisu agrikultura Munisipál sira hodi apoiu natar nain sira, hasa'e númeru produsaun hare nian iha rai laran, reduz fós importasaun.

"Entaun tinan-2023 ita sosa tán (traktór kubota)  45 unidades, 45 ne'e Baukau hetan 10 unidades, tanba Baukau iha irigasaun 3, depois Munisípiu ne'ebé irrigasaun ida ita fó 5 ba, entaun restu ita rai iha Dili bele fó apoiu karik Munisípiu ne'ebé mak presiza halo inspeksaun ba rai abandona ne'ebé boot ita fó, maibé Munisípiu ne'ebe la poténsia ita la fó traktór ne'ebé mak atu sosa agora", dehan nia hafoin realiza enkontru ho dirijente agrikultura iha salaun apuramentu Baukau, Kuarta (28/12)

Bazeia ba relatóriu inspesaun jerál estadu ba traktór sira iha teritóriu nasionál, fulan hirak liuba hato'o ona rezultadu ba Primeiru Ministru (PM) hodi haree.

Hafoin PM haree rezultadu inspesaun, enkamiña hikas relatóriu refere ba Ministru Agrikultura no Peskas hodi orienta diresaun Nasionál Agrikultura no Ortikutura halo hikas identifikasaun molok sosa traktór foun iha tinan-2023.

"Primeiru lugar traktór sira ne'e sosa kleur ona, sé halo manutensaun pengeluaraan boot la halimar, tán ne'e mak ita halo identifikasaun ida ne'ebé mak sei bele halo operasaun pois tekníku sira hadi’a, maibé balun labele ona ita rekomenda ba superior sira bele rai", nia hatutan

Entretantu tratór ne'ebé antes ne'e, Governu anterior sira fahe ba Munisípiu Baukau hamutuk 30-resin, dadaun 10 mak bele halo operasaun, maibé 20 resin labele halo operasaun, tanba kondisaun aat. (*)