Vise Ministru Obras Públika (MOP), Nicolao Lino Freitas hatete, sira fó despaisu ba IJE tanba bazeia ba proposta ne'ebe aprezenta husi autoridade munisípiu 12 inklui RAEOA oinsá atubele haree kestaun ida ne'e.
“Ba sentru votasaun, husi Obras Públika ita esforsu ona, despaisu ba ona IJE atu kanaliza ekipamentu sira ne'e ba proposta ne'ebé mai husi autoridade sira, liliu ba sentru votasaun, para nune'e bele fasilita ita-nia komunidade sira para bele hetan oportunidade ba vota tuir konsiénsia ne'ebé sira iha, e proposta ne'e kuaze 12 munisípiu ne'e iha hotu ona”, dehan nia iha Parlamentu Nasionál (PN), kinta (24/02).
Ho ekipamentu ne'ebé IJE prepara maske la sufisiènte atu kobre teritóriu tomak, maibé sei klasifika parte sira ne'ebé mak urjente atu atende hanesan estrada kotu totál ka rai taka estrada.
“Pedidu ne'e mai husi autoridade munisípiu sira, ne'ebé iha meza leten no ita orienta ona ba IJE para kordena, bele ezekuta iha tempu badak, hodi mobiliza rekursu ekipamentu ne'ebé Estadu iha”, afirma nia. (*)