“Ohin importante liu depois de simu karta kredensiál iha reuniaun ne'ebé Prezidente Repúblika hala'o ho embaixadór, importante ne'ebé sua esélensia Prezidente Repúblika foka liu mak, oinsá Governu Austrália bele ajuda hodi aselera fiber optics mai ita-nia pais, nune'e hasa’e kapasidade asesu sidadaun nian ba internet”, dehan Vise Ministru Negósiu Estranjeiru no Kooperasaun (V-MNEK), Julião da Silva hafoin partispa PR Lú Olo simu karta kredensiál husi Embaixadór Austrália iha Palasíu Prezidentiál Bairopite, sesta (25/02).
Tanba loron 1 fulan-outubru 2021, Gabinete Ministériu Finansas fó sai katak, projetu instalasaun kabu submariñu fibra ótika (fiber optic) ne’ebé liga husi Darwin-Austrália mai Dili, nia dezeñu enjeñaria iha ona faze finál no Komisaun Nasionál Aprovizionamentu inisia ona konkursu no hahú simu submisaun proposta tékniku no finanseiru to’o iha 11 Outubru 2021.
Ba projetu instalasaun fibra ótika ne’e sei halo servisu rede telefone no internet ne’ebé lalais no baratu liu iha Timor-Lestez atu fasilita sidadaun sira. Ho finansiamentu ba projetu mai husi Fundu Infraestrutura ho kustu estimativu millaun $42.
Entretantu Prezidente Repúblika husu atu Governu Austrália bele fó kontinuasaun servisu hamutuk ho Ministru Negósiu Estranjeiru no Kooperasaun ba bolsu estudu ba sidadaun sira, nune'e bele kontinua.
“Ikus liu oinsá mak Governu Austrália kontinuasaun boavontade atu ajuda, hodi halo investementu ba dezenvolve Portu Hera no Aireoportu Nikolao Lobato, ne'ebé Governu hahú dadauk halo dezeñu atu konstrui iha tempu badak, tinan ne'e ka tinan rua, tolu mai tan no asuntu sira seluk liliu mós ida kona-ba sua esélensia Prezidente Repúblika husu atu kontinua apoiu simu ita-nia sidadaun sira, joven sira ba programa Seasonal worker iha Australia”, informa Julião da Silva.
Maske progresu dezenvolvimentu lubuk ida tantu infraestrutura, dezenvolvimentu rekursu umanu ne'ebé Governu Austrália mós halo investementu barak ba País Timor-Leste.
Embaixadór Austrália, William Terrence Castelo, ne’ebé entrega ona karta kredensiál ba Prezidente Repúblika hodi troka Embaixadór Austrália, Piter Robet nia mandatu ne'ebé hotu ona iha tinan 2022.
Nune'e embaixadór William sei hahú hala'o ona atividade iha Embaixada iha Timor-Leste durante tinan haat (4). (*)
