“Objetivu husi eventu ohin ne'e, mak atu oinsá parte husi Governu no Família hodi assina deklarasaun atu sai hanesan komitmentu ida katak inan aman no família prontu ona husik sira-nia oan, laen husi sira-nia le'et atu ba servisu iha ema nia rain. La'ós Governu mak obriga maibé Governu kria kondisaun de'it, oprotunidade ne'e traballadór sira mak aproveita”, dehan Diretór Nasional Diresaun Nasionál Empregu Exterior, Filomeno Soares iha Salaun DNEE, Bekora, kuarta (25/02).

Maibé atu aproveita oportunidade sira ne'e, traballadór sira tenke kumpri rekezitus balun hodi asegura sira, bainhira servisu iha Korea Súl. Tanba prosesu haruka traballu sira ba servisu iha rai liur la'ós prosesu fasil, maibé liu husi prosesu ne'ebe naruk.

“Ita husu traballadór ne'ebé hetan ona oportunidade atu aproveita ho didi’ak”, hameno nia.

Traballadór sira ne’ebe atu aranka ba Korea Súl ho totál 96, sei ba servisu iha área peskas no ‘area fábrika.

Ba família ka inan aman ne'ebé lakohi atu sira-nia família ba servisu iha rai liur labele asina deklarasaun ne'ebé prepara ona husi Governu, atu labele prezidika prosesu iha futuru.

Reprezentante Traballadór, Almerinu Afonsu hatete, nia parte kontente no triste tanba programa Governu nian ne'ebé haruka sira ba servisu iha rai liur hanesan kampu traballu ida ba sira.

“Sentimentu triste mak montante osan ne'ebé ami hatama mak totál 450 dollar amerika. Ami sei tuir teste PCR ba dala rua nian karik iha rezultadu mak ami hetan negativu entaun ami sei aranka ba Korea Súl, maibé rezultadu mak iha pozitivu mak ami sei kurentina iha Timor durante loron 14”, dehan nia.

Reprezentante Família Traballadór Timoroan nian, Laura de Sousa Carvalho hatete, família nian sente orgullu tanba sira-nia oan sira hetan oportunidade ba servisu iha ema nia rai hodi hadi’a familia nian moris.

“Servisu ne'ebé sira hala'o ne'e todan entaun família sira presiza halo orasaun no kria unidade ne'ebe solidu iha uma laran. Nune'e motivu sira halo servisi iha rai liur. Mensajen husi ami mak sira ba tenke kuidadu saúde no fiziku sira-nia tanba ambiente iha ema nia la hanesan ita-nia”, dehan nia. (*)