"Durante fulan-janeiru no fevereiru dadus ne'ebé akontese hamutuk uma 30 no uma adat ida," dehan Diretór Protesaun Sivil Baukau, Nelson Nunes iha kna'ar fatin vila nova, tersa (01/03).
Husi estragus ne'e, iha Postu Baukau Vila uma 10, kompostu husi Suku Bahu uma-ida, Seiçal uma-2, Samalari uma-ida, Trilolo uma-ida, Gariuai uma-ida, Bukoli uma-ida, Triloka uma-ida no Kaibada uma-2, enkuantu iha Postu Laga, Suku Tekinaumata no Atelari uma-2.
Postu Baguia, Suku Lavateri uma-5, Afaloikai uma-ida, Suku Defawasi uma-ida no Postu Kelikai, Suku Abu uma-ida, Lakuliu uma-ida, Laisorulai de Baixo no dexima uma-2.
Postu Venilale, Suku Fatulia uma-2, Uailah uma-2, Umanaiku uma adat-ida, Uaioli uma-ida, Baduho uma-ida no Postu Vemase, Suku Ossouala uma-ida.
Dezastre ne’e, ékipa protesaun Sivil Baukau kontinua halo levantamentu dadus atu hatene uma hira hetan estragus totál no estragus kaman.
"Husi dadus ne'ebé ita haree maioria ne'e, sira la'os estragus totál, sira tama iha segundu klasifikasaun katak, estragus natoon, entaun ékipa prezisa ba haree direita halo verifikasaun atu relata ba nasionál hodi vítima sira bele hetan ajuda rekuperasaun husi estadu," nia hatete
Maibé durante fulan-2 nia laran, Protesaun Sivil Baukau apoiu emerjénsia ona ba uma ka'in 20 resin, enkuatu uma ka'in seluk ne'ebé seidauk hetan apoiu emerjénsia, tanba dadus husi vítima dezastre naturál seidauk kompletu.
"Ita prezisa dokumentus ne'ebé kompletu, informasaun ita rejistu, maibé dokumentus balun seidauk komprova lolos katak loos ga la'e, dadus ne'e hanesan dadus premináriu seidauk fixu," nia afirma
Tanba ne'e, nafatin halo kordenasaun ho pontu fokal iha Postu Administrativu atu bele relata dokumentus kompletu, nune'e tempu badak bele fó apoiu emerjénsia.
Alende ne'e, nafatin apela ba komunidade sira iha Munisípiu Baukau ne'ebé hela iha fatin risku, hanesan iha hela fatin iha rai lolon no rai hun, besik mota no tasi ibun, atu hakmatek matan moris iha tempu udan atu salva vida husi dezastre sira.
Enkuantu Protesaun Sivil Baukau rejistu uma ka'in ne'ebé hetan estragus husi udan no anin durante fulan-2 nia laran, la rejistu sidadaun ruma mate. (*)
