Koordenadora Téknika PNDS Posto Soibada, Terezinha da Costa Moniz hatete, projetu Konstrusaun UKL ne'e kada suku hetan uma 12 no kada aldeia hetan uma neen (6) totál husi suku 4 ne'e iha uma hamutuk 45.
“Husi orsamento $540 miliaun ne'e ita aloka kada suku ho montante millaun $135 hodi konstrui uma hamutuk 12 iha suku laran”, dehan Koordenadora Terezinha, liuhusi telefone, tersa (22/03).
Konstrusaun uma 45 ne'e ho medida kuartu 3 nian hamutuk 21, kada uma ho montante osan rihun $17, no ba medida kuartu 2 nian iha 24, totál osan ba kada uma iha rihun $14.
“Orsamento ba konstrusaun projeto UKL ne'e transfere ona ba konta bankaria kada suku, no oras ne'e dadaun ita halo ona sosializasaun ba komunidade benefisiaria sira ne'ebe mak ita identifika ona”, dehan nia.
Benifisiariu sira ne'ebé mak identifikadu ona ne'e hamutuk 45 ema hirak ne'e merese duni sai benefisiáriu tanba sira la iha Kbi’it hodi konstrui uma ho dignu ba sira hodi hela, no husi programa UKL ne'e tulun tebes sira hodi asesu ba uma ho dignu.
Entretantu Benefisiária, Filomena da Costa, agradese tebes ba Governu tanba bele kria ona politika ida hodi tulun komunidade sira ne'ebé mak laiha kbi’it hodi konstrui hela fatin.
“Ho politika konstrusaun Uma Kbi’it Laek ne'e ita haree tulun tebes ami sira ne'ebé mak laiha osan hodi halo uma ne'ebé mak di’ak”, afirma nia.
Tanba ne'e ho apoiu konstrusaun uma ne'ebé Governu halo ba kbi’it laek sira ne'e fiar katak husi politika implementasaun projeto UKL ne'e bele hadi'a ona ema kbi’it la’ek nia moris liuhusi konstrui uma ne'ebé mak dignu. (*)
