Ministru Administrasaun Estatal, Miguel Pereira de Carvalho hatete, distribuaisaun ekipamentu hanesan Komputadór, mákina imprime (printer) no UPS (Uninterruptible power supply) sei hahú iha munisípiu Ermera, tanba Governu iha kompromisu atu apoiu hadi’a funsionamentu suku 452, oinsá bele tau matan ba interese públiku.
“Governu Daualu Konstituisionál, komprometidu hodi hadi'a funsionamentu administrasaun suku iha territóriu Timor-Leste hodi nune'e bele fasilita suku sira kolabora ho órgaun sira e servisu Administrasaun Públika nian hodi tau matan ba interesse públiku no komunidade nian”, dehan nia hafoin realiza serimónia distribuisaun ekipamentu eletróniku iha Gleno, Ermera, segunda (28/03).
Ho prosesu distribuisaun ekipamentu ne'e Governu sei hahú iha Ermera no sei kontinua ba Munisípiu sira seluk, inklui RAEOA no Ataúru. Aleinde tuir planu sei realiza mós distribuisaun iha Baukau, Dili no munisípiu sira seluk nebé previstu atu konklui iha fulan-abril 2022 nian laran.
“Iha tinan rua ikus ne'e, VIII Governo Constitucional, liuhusi Ministériu Administrasaun Estatál, halo esforsus hotu hodi hadi’a funsionamentu administrasaun suku sira-nian hanesan reabilita ona sede suku 400 (sede suku 52 sei reabilita iha tinan 2023), hasa’e insentivu Xefe Suku no membru Konsellu Suku sira, no hahú dadaun distribui ekipamentu eletróniku ba suku sira”, esplika nia.
Tanba ne'e, hakarak dehan ba autoridade lokál sira hotu katak obrigasaun no dever Governu nian mak fasilita suku sira ho meiu no rekursu adekuadu hodi nune'e suku sira bele ezerse sira-nia atribuisaun tuir Lei Suku (Lei no. 9/2016), bele tau matan ba vida moris povo nian.
“Ha’u mós apela ba Xefe Suku ho membru Konsellu Suku sira hotu atu kolabora ho adminitrasaun lokál estadu no administrasaun Sentral hodi tau matan ba interesse públiku no komunidade nian iha suku sira, hatete nia.
Ba serimónia ne'ebé hala'o iha munisípiu Ermera, Ministru Administrasaun Estatal mós lansa plataforma informátika Sistema Integradu Jesstaun Administrasaun Suku no Aldeia (SIGSA) ne’ebé nia objetivu hodi rejista livrru Suku sira iha forma eletrónika no Online. (*)
