“SEFOPE liuhusi Diresaun Nasionál Empregu Exterior (DNEE) realiza seremónia asina deklarasaun ho família traballadór na’in-23, iha loron tersa (29/03) atu husik oan, la’en ba servisu ba nasaun Austrália. Traballadór sira ne'e sei aranka ba Austrália aban (30/03) ba etapa dahuluk nian”, informa Diretór Diresaun Nasionál Empregu Exterior, Filomeno Soares, iha Salaun Kannosiana, Bekora, tersa (29/03).
Ho serimónia ne’ebé halo oinsá parte husi Governu no família hodi assina deklarasaun atu sai hanesan kompromisu ida katak inan aman no família prontu ona husik sira-nia oan, la’en husi sira nia le'et atu ba servisu iha ema nia rain.
Tanba ne’e, la'ós Governu mak obriga timoroan atu ba servisu, maibé Governu kria kondisaun de'it, oprotunidade ne'e traballadór sira mak aproveita.
Bainhira atu aproveita oportunidade sira ne'e, traballadór sira tenke kumpri rekezitu balun hodi asegura sira, bainhira servisu iha Austrália. Tanba prosesu haruka traballu sira ba servisu iha rai liur la'ós prosesu fasil, maibé liuhusi prosesu ne'ebé naruk.
Ho ida ne’e, husu ba traballadór ne'ebé hetan ona oportunidade atu aproveita ho didi’ak hodi bele loke dalan ba joven sira iha futuru.
Traballadór sira ne’ebé atu aranka ba Austrália ho totál ema na’in-23, kompostu husi traballadór foun na'in-5 no traballadór tuan na'in-18 iha feto na'in-4 no mane na'in-19, sei destaka ba kompaña Freshwater Quality Management iha na’in-6, feto na'in-4 no mane na'in-2, Costa Farm iha ema na’in-12 mane hotu, Brockfield ema na’in-5 mane hotu. Traballadór sira ne'e destaka iha área ortikultura no área ospitalidade.
Iha mós traballadór sira ne'ebé sei aranka ba Austrália iha Etapa daruak (II) nian ho totál ema na’in-17, iha trabaladór foun na'in-3 no tuan na'in-14 sei destaka ba kompaña Costa Farm no Brockfield. Traballadór sira sei aranka ba Austrália iha loron sesta (01/04).
Reprezentante Traballadór, Armindo Pintu Ribeiru Munisípiu Lautein hatete, nia parte kontente tanba liuhusi programa Sezeonal Worker ne'e bele ba servisu iha Austrália.
“Objetivu ha’u-nian mak atu hadi’a família uma laran nian, kontinua Estudu no ajuda alin sira ba eskola”, dehan nia.
Antes ne'e, traballadór hala'o ona servisu iha Austrália no sei kontinua servisu iha kompaña Costa Farm iha área ortikultura ho durasaun fulan sia. (*)
