“Ha’u ba servisu iha Austrália dala haat ona no agora ba dala lima nian to'o. Antes ne'e, ha’u rekolla ona osan hamutuk rihun $50 dollar Amerika. Osan sira ne'e ha’u investe ona hodi hadi’a nessesidade hanesan hadi’a uma, selu alin nia eskola no uza ba negósiu inklui halo buat seluk hanesan sosa transporte no sira seluk”, dehan Traballadór Armindo Pinto Ribeiro iha Salaun DNEE, Bekora, tersa (29/03).
Ho esforsu no badinas ne’ebé nia iha Armindo konsege hetan tan oportunidade ba servisu iha Austrália, tanba servisu ho badinas no hatudu atitude ne'ebé di'ak, no dedika-an ba kompaña ne'ebé mak servisu ba.
Tanba ne’e, kompaña sira louva no apresia servisu ne'ebé halo bainhira kontratu hotu sira kontaktu ba SEFOPE no hetan nafatin oportunidade atu servisu iha sira-nia kompaña.
Nu'udar traballadór Timoroan sente kontente no orgullu tebes tanba hein oportunidade ida ne'e kleur tebetebes no espera liuhusi oportunidade ida ne'e bele hadi’a di’ak liután moris.
“Ha’u agradese tebes liuhusi programa ida ne'e, ha’u hetan oportunidade ba servisu iha nasaun Austrália kuaze dala haat ba dala lima ona”, afirma nia.
Iha oportunidade ne'e, Armindo sei ba servisu iha Kompaña Costa Farm iha Austrália ho durasaun fulan 9, hafoin bele fila mai iha Timor-Leste.
Enkuantu traballadór ne'e, kumpri ona regras Organisaun Mundiál Saúde (OMS) liuhusi vasina kompletu doze datolu antes ba servisu iha nasaun Austrália. (*)