“Tuir informasaun ne'ebé ha’u hetan katak Parlamentu Nasionál (PN) aprova programa Uma Kbi'it La'ek (UKL) kada suku hetan uma sanulu maibé implementasaun iha terenu sia de’it. Ne'e hanesan diskriminasaun ba suku sira tanba balun hetan sanulu no balun liután maibé ami hetan uma sia de'it, enkuantu orsamentu ne'ebé aloka ba programa UKL ne'e aloka ba uma sanulu nian maibé iha suku balun hetan sia de'it entaun orsamentu ba uma ida nian iha ne'ebé”, dehan Gaspar de Araujo, hafoin Partisipa Diálogu Komunitáriu ho MAPkoms iha Postu Administrativu Turiskai, sesta (25/03).
Diretora Programa Nasionál Dezenvolvimentu Suku (PNDS), Claudinha Soares Pinto, rekuñese Parlamentu Nasional (PN) aprova programa Uma Kbi'it La'ek (UKL) kada suku hetan uma sanulu maibé implementasaun iha terenu sia ne'e los.
“Parlamentu Nasionál (PN) aprova programa UKL kada suku hetan uma sanulu. Tinan kotuk atividade ne'e dezeña Suku ida aldeia ida hetan uma tolu. Enkuantu suku ne'ebé iha aldeia haat mai kraik tinan kotuk kada aldeia hetan uma tolu, se tinan ne'e sira hetan tan ne'e hotu ona”, esplika Claudinha Soares Pinto iha kna'ar fatin, Kolmera, tersa (29/03).
Maibé oinsá ho suku ne'ebé aldeia barak ezemplu hanesan suku Makadiki ne'ebé aldeia hamutuk ruanulu-resin-ida sei lajustu bainhira sira hetan de’it uma sia, dadaun ne'e iha aldeia lima mak hetan ona no aldeia sira seluk seidauk.
Enkuantu jestaun interna tenke halo hanesan ne'e, atu nune'e bele iha balansu ba suku hothotu no bele reduz aldeia sira ne'ebé hetan ona tanba tarjetu ba aldeia la'ós iha suku.
“Ami halo jestaun ba suku ne'ebé ho aldeia ki’ikoan sei hetan uma sia no nia poupansa ba uma sia ne'e, sei implementa fali ba suku ne'ebé ho aldeia barak atu reduz ona la’ós ami hamenus sen razaun”, informa nia.
Alende ne'e, tinan 2021, suku ida aldeia ida uma tolu diferente iha tinan 2022, suku ida aldeia haat bele hetan uma sia ka sanulu kada aldeia maibé aldeia ualu ba leten sei halo uma sanulu-resin-rua ba leten atu implementa ba aldeia haat bele reduz ona sira-nia aldeia.
Ba totál aldeia ba implementasaun programa ne'e hamutuk aldeia 2.025 husi suku atus 424 iha Munisípiu 13 sei la sufisiente karik kada suku hetan hotu uma sanulu. (*)
