Prezidente Interinu Komisaun E Infraestrutura, Favião Oliveira hatete, antes ne'e sira halo audénsia ho Atoridade Nasionál Komunikasaun (ANC) hodi rona, tanba ne'e prekupasaun husi deputada opizisaun sira nomós konsumidór sira ne'ebé durante asesu ba internete.

"Ohin ami bolu operadores na'in-3 ne'ebé iha Timor-Leste eziste Timor Telecom, Telkomcel no Telemor atu rona mós sira-nia difikuldade e sira fó rekomendasaun lubuk ida e sira mós fó esplikasaun klaru tanba saida mak internete la'o lentu liu, ne'e tanba tore ida bele kobre de'it 200 klíente, iha tempu ne'ebé hanesan, tanba ne'e mak sira iha aumenta tan ba 300 ate 400”, dehan nia iha Parlamentu Nasionál, kuarta (06/04).

Ba operadór sira ejize durante ne'e sira mós aluga antena satelite ne'e presu karun ne'ebé sira ejize nafatin katak di'ak liu ne'e kabu submarinu dada mai Timor-Leste ho lalais.

“Ha'u hanoin Primeiru Ministru, Governu tau prioridade ba ida ne'e, para kabu submarinu dada ona tanba iha prosesu tenderizasaun ida ne'e mak ita haree, e segundu sira mós rekomenda ba ANC la'ós tinan-tinan kobre de'it taxa ba Governu, ne'ebé iha kooperasaun di'ak para ita-nia operadór sira mós satisfas ho atendementu ne'ebé hanesan autoridade regular ba operadór sira ne'e importante tebes”, afirma nia.

Enkuantu deputadu sira mós hato'o pergunta no susjestaun atubele atendementu iha parte telekomunikasaun operadór sira ne'e ho kualidade nune'e klíente sira mós iha satisfas ho saida mak durante ne'e sira oferese liuhusi liña internete.

Diretór Ezekutivu Timor Telecom, Manuel Cárceres hatete, komisaun E Parlamentu Nasionál mak hato'o konvite ba operatór telekomunikasaun tolu hanesan Telkomcel, Telemor ho Timor Telecom atu mai partilla informasaun, rona prekupasaun sira no kliente operadór sira-nian hato'o ba deputadu sira.

“Ohin ami ko'alia liu kona-ba servisu internete nian, ita hatene katak ne'e ralidade ida, iha lamentasaun barbarak katak, internet eiha ita-nia rai ne'e la'o seidauk to'o iha nível satisfasaun ida ke halo ita-nia klíente sira kontente. Ne'e realidade ida ke operadór na'in-3 la subar, rekoñese, maibé agora ita buka solusaun oinsá mak bele rezolve tiha internete iha ita-nia rai”, dehan nia.

Nune'e sira simu prekupasaun sira ne'e no rekoñese katak iha duni problema internete iha Timor-Leste, maibé husu ba deputadu sira atubele informa ba Governu oinsá atubele buka solusaun hodi dada kabu submarnu.

“Ami simu preokupasaun sira ne'e, ami mós informa rekoñese katak iha duni problema ho internet iha ita-nia rai, e ami mós hato'o ba na’i deputadu sira atu hatutan ba Governu se bele dalan atu rezolve ita-nia internete mak kabu submarinu (fibra ótika) ne'e de'it”, katak nia.

Tanba operadór sira ne'e hotu uza satelite mak transmite mai rai no distánsia satellite mai rai ne'e balun kilometru rihun-8, balun liután entaun atmosfera ne'e influénsia mós ba rede internete iha Timor-Leste.

“Ami atu rezolve situasaun ne'e so kabu submarinu (Fibra ótika) ne'e, ita agora uza husi satellite e ita uza mós husi Telkomcel nian ne'ebé dada husi ita-nia fronteira sorin mai maibé ne'e la razolve ita-nia situasaun ne'e”, hatete Manuel.

Maibé deputadu sira mós husu operadór 3 ne'e prontu atu koopera ho Estadu, tanba operadór tolu mós kumpromitidu nafatin no esforsu-an nafatin atu hadi’a kualidade la'ós ba internete de'it, kualidade rede sira, nafatin hadi’a.

“Ita-nia rasik iha Timor laiha, ita dependente ba rai liur, kuandu falla, pur ezemplu naton loron 5, ou 6 Timor laran internete laiha ne'e tanba rede ida mai husi Indonézia ne'e kotu tiha iha Flores ne'ebá, ne'e influénsia tebtebes tanba ita laiha”, esplika nia. (*)