Sekretária Autóridade Munisípiu Baukau, Simão dos Santos Marques Pinhero, hatete, osan ba selebra loron restaurasaun indepedensia 20 de maiu nian husi nasionál la aloka mai Munísipiu Baukau, maibé osan ne'ebé atu selebra ba loron refere Autoridade Munísipal, utiliza husi orsamentu ne'ebé preve kada anuál.
"Ita iha US$6.000 dia 20 de maiu nian, ne'e agrupa ona ho Postu Adminisitrativu, kada Postu Adminisitrativu ita atribui US$750 ba kada Postu," dehan nia iha kna'ar fatin Administrasaun Baukau, kuarta (27/04).
Ba selebra loron restaurasaun indepedensia 20 de maiu nian, kada Postu hanesan Postu Baguia, Laga, Kelikai, Venilale no Vemase, sei selebra mesak, maibé Postu Baukau Vila sei selebra isar bandeira hamutuk ho parte Autoridade Munísipal iha resintu Asministrasaun nian oin.
Tanba ne'e, konvida parte veternu hotu iha Munísipiu Baukau, atu partisipa iha serimonia refere.
Tuir planu, iha selebra loron 20 Maiu, sei iha Misa, hafoin dada bandeira no ikus sei ba vizita rate saudozu sira nian. (*)