"Injustisa sosial ida ohin hau mensiona 4 a 7 ne'ebe simu ona rihun $1.300 dala ida, ohin sai penonton hela ba sira seluk, la simu ona, (total 25.909). e Zero a Tres ne'ebe la simu nein buat ida, tinan tolu hela iha ailaran mais depois la prienxe rekezitu 4 a 7 para atu hetan netik ida rihun $1.300 ne'e, 11.031 e rua ne'e hamutuk 36.940. Ita koalia fundu ida ohin billaun $1 ne'e ninia funan ka lukru ne'e atu atende nesesidade 36.940”, dehan Ministru ba Asuntu Kombatente no Libertasaun Nasionál, Julio Sarmento da Costa ‘Meta Mali’ hafoin marka audénsia ho komisaun espesializada, B, C, D, E, iha Parlamentu Nasionál, tersa (03/05).

Tanba ne'e, prezensa MAKLN iha audénsia públika ne'e atu defende de'it proposta prevee billaun $1 ba fundu Veteranu, nune'e iha tinan 2023 Governu bele foti nia funan hodi rezolve problema injustisa ida ne'e.

Tanba ko'alia kona-ba veteranu sira husi 4 a 7 ne'e pelu menus sira simu ona osan rihun $1.300 maibé sira ne'ebe Zero a Tres to'o agora la simu buat ida husi estadu.

Nune'e Governu hanoin katak injustisa mosu iha veteranu tanba 8-14, 15-19, 20-24 simu osan fula-fulan maibé ida ne'ebé la priense rekezitu mak (zero a tres).

“Ida ne'e ita atu ko’alia loloos katak zero a tres ne'e ema ba baze de apoiu, e baze apoiu rahun iha ai-laran ne'e tinan tolu, la'ós kuatru a sete. Mais kuatru a sete hetan netik rihun $1.300 dala ida, e ida tinan tolu iha ai-laran ne'e la simu buat ida, tanba ne'e mak Governu sente ba mai katak injustisa”, esplika nia.

Dadauk Governu husu autorizasaun husi Parlamentu Nasionál liuhusi surat tahan ruma para banku federál Amerika bele muda osan billaun $1 ba fundu veteran, no osan ne'e sei la gasta loroloron, maibé hein to'o tinan ida atubele hetan nia lukru husi billaun $1 ne'e hodi bele sustenta ba veteranu sira ne'ebé mak (zero a tres) ho (kuatru a sete).

“Serake oitavu Governu mak jere, serake Governu foun tuir mai tinan 2023, maibé planu Governu nian tenke halo dadaun. Ami hein nafatin ita-boot sira-ninia disponibilidade ho vontade atubele aprova ami-nia proposta ida ne'e”, hatete nia.

Husi fundu veteranu ne'e, karik iha momentu ida, Governu mós bele dada filafali osan ida billaun $1 ne'e, maibé agora ne'e Governu garantia katak kada tinan mak fundu veteranu ne'e hetan lukru husi pursentu 2 to'o pursentu 3 mak ida ne'e sei bele sustenta nesesidade sira kona-ba veteranu. (*)