“Objetivu loron ohin importante tebes, tanba ne'e konvida traballdór sira marka prezensa iha ne'e hetan akompaña husi Sua Eselénsia Primeiru Ministru, Taur Matan Ruak hodi asiste no fó hanoin ba ita-boot sira bainhira atu ba servisu iha Kórea Súl. Tanba ne'e, responsabilidade ita hothotu nian tantu família no Governu”, informa Diretór Diresaun Nasionál Empregu Exterior, Filomeno Soares, iha Ótel Timor Logde, sesta (06/05).

Preparasaun dadus traballadór sira hamutuk na'in-93 Pesóal maibé tanba traballadór balun hasoru problema família no finanseiru. Nune’e traballadór sira ne'ebé mak aranka ba Kórea Súl hamutuk na'in-87 Pesóal, kompostu husi feto na'in-2 no Mane na'in-85 ne'ebe sei destaka iha área fábrika no peskas.

Orsamentu ne'ebé mak aloka ba transporte atu ba Kórea Súl ne'e responsabiliza husi família no traballadór sira.

Maibé programa sira ne'e realiza tanba Governu investe iha Programa formasaun lian Kórea hodi prepara joven sira ba servisu iha Korea.

Nune'e, Programa Mobility Laboral hahú iha tinan 2009 hodi haruka traballadór sira ba servisu iha Kórea Súl. Traballadór ne'ebe servisu iha Kórea Súl husi tinan 2009 are agora hamutuk rihun 4404.

Sekretáriu Estadu Formasaun Profesionál no Empregu (SEFOPE), Alarico do Rosario hatete, atividade despedida ita halo ba traballadór hamutuk na'in-87 ne'ebé sei ba servisu iha nasaun Kórea Súl.

Nune'e, SEFOPE konvida família traballadór sira-nian atu asina akordu entre família ho Governu nian bainhira traballadór sira ba servisu iha nasaun Kórea Súl sei lori Timor nia naran tanba ne'e, tenke ho disiplina, kumpri regra no labele halai ses husi sistema.

“Traballadór sira sei ba servisu iha Kórea Súl tanba ne'e, ami konvida Sua Exelensia atu fó hanoin ba ita-nia traballadór sira kona-ba servisu no saida mak terus iha ema nia rai atu sei hanesan bukae ida bainhira servisu iha ema nia rai”, dehan Alarico.

Atividade ne'e, partisipa husi Primeiru Ministru (PM), Taur Matan Ruak, ekipa Embaixada Kórea Súl iha Timor-Leste no Ajensia Air Timor. (*)