Porta voz, Domingos Samasula, hatete, ohin loron mosu ema estranjeiru barak ne’ebé invade ona ekonómia iha Timor-Leste (TL) hahú husi nasionál to’o nível Aldeia, fó impaktu ba negósiante lokál sira sai fali bainaka ba nia rain rasik.

"Ami negósiante Baukau, hasoru ezisténsia negósiante estranjeiru (Xineza) lakohi fó ulun ba negósiu estranjeiru atu sama ami nia ulun, ami lakohi hanesan maluk sira iha Afrika sai bainaka hodi ema supa," dehan nia liuhusi konferensia imprensa iha salaun Mistériu vila nova Baukau, tersa (24/05).

Tuir nia, maske Timor-Leste iha merkadu livre, maibé ukun na’in sira presiza haree atu empreza estranjeiru sira ne'ebé halo negósiu iha Munísipiu, labele kompete fali ho empreza nasionál ho produtu ne'ebé hanesan, maibé empreza estranjeiru sira presiza mak kria empreza boot atu fó servisu ba Timor-oan sira hanesan loke fabrika no seluk tán.

"Estranjeiru tama dadaun ne'e, fa’an sasan retallu nian hada'u malu ho ami iha Munísipiu Baukau," nia kestiona

Nune’e, husu ba Servisu Rejistrasaun no Verifikasaun Emprezariál (SERVE.IP) atu hasai despaixu no alterasaunn lisensa negósiu labele fó tán lisensa negósiu nian ba empreza estranjeiru sira halo negósiu k’ik iha Munísipiu Baukau.

Empreza Baukau oan, Marcelino Joaquim Pinto mós la satisfas empreza Xineza sira halo negósiu iha Munísipiu Baukau, tanba sasan nesesidade bázika no matérial kontrusaun nian ne'ebé fa’an empreza lokál fa’an, kuaze Xineza sira mós fa’an, entaun difikulta empreza lokál.

"Buat ne'ebé ami fa’an, sira mós mai fa’an ida ne'e, ami fa’an modo sira mós mai fa’an modo, ami fa’an aikose, sira mós mai fa’an aikose," nia argumenta

Husu Autoridade Munísipiu no SERVE.IP tenke kansella lisensa negósiu nian ba Xineza, nune'e labele hala'o negósiu ki’ik hanesan ho empreza lokál sira iha Munísipiu Baukau.

Entretantu, empreza Xineza ne'ebé dadaun hala'o aktividade negósiu iha Munísipiu Baukau hamutuk 9. (*)